Virtualnyja numary ŭ abjavach. Abarona ad machlaroŭ ci dapamoha dla pierakupaŭ?
Najbujniejšy sajt dla prodažu aŭto dadaŭ funkcyju zamieny realnaha numara na virtualny. Ale nie ŭsie zadavolenyja takoj mahčymaściu. Raźbirajemsia, jakija plusy i minusy jość u takich pasłuh.
Pačynajučy z 7 lipienia, na sajcie av.by źjaviłasia funkcyja «Abarona numara».
Jana dazvalaje pry padačy abjavy vykarystoŭvać virtualny (padmienny) numar zamiest realnaha. Pa zmoŭčvańni hetaja funkcyja ŭklučanaja, ale pry žadańni pradaviec moža adklučyć jaje ŭ adzin klik.
Fota: skrynšot z sajta av.by
Kali hetaha nie zrabić, to zamiest vašaha numara ŭ abjavie budzie adlustroŭvacca numar virtualny, jaki da taho ž budzie źmianiacca raz na sutki.
Heta, darečy, nie nou-chau av.by, padobnuju schiemu z vykarystańniem virtualnych numaroŭ vykarystoŭvaje najbujniejšaja litoŭskaja placoŭka dla prodažu aŭto, zapčastak i inšaj techniki — autoplius.lt.
Ale dla Biełarusi av.by staŭ pieršym kłasifajdam z padobnym interfiejsam.
Dla čaho virtualnyja numary ŭ abjavach ab prodažy?
Asnoŭnaja fiška — heta abarona pradaŭcoŭ ad zvankoŭ machlaroŭ, jakija mohuć patelefanavać vam u niejki miesiendžar, a taksama filtr ad spam-rassyłki ŭ vyhladzie SMS, bo na virtualny (padmienny) numar nielha dasłać paviedamleńnie. Tamu heta pierš za ŭsio abarona ad nazolnych SMS, jakija adrazu paśla źjaŭleńnia abjavy pačynajuć dasyłać nadakučlivyja aŭtakamisy.
Praŭda, ci nie stanuć jany zamiest hetaha nadakučvać zvankami — pakaža čas.
Taksama padmienny numar abaraniaje vaš realny numar ad traplańnia ŭ roznyja bazy, jakija potym mohuć pradavać, a vam buduć pastupać nadakučlivyja vykliki z zaklikam niešta nabyć abo naviedać ci prosta ad machlaroŭ.
Ilustracyjny zdymak. Fota: Naša Niva
Virtualnyja telefonnyja numary: kolki kaštuje biaśpieka i ananimnaść
Što da dadatkovych vydatkaŭ, to ich nie budzie ni ŭ pradaŭca, jaki raźmiaściŭ abjavu, ni ŭ patencyjnaha kupca.
Kupiec datelefanujecca da pradaŭca pa virtualnym numary biez dadatkovych vydatkaŭ.
Pry hetym pradaviec budzie bačyć realny numar telefona kupca, tamu zmoža biez prablem pieratelefanavać jamu, kali raptam prapuścić vyklik. Taksama pradaviec moža pieratelefanavać i dla taho, kab klijent bačyŭ jaho realny numar, kab źviazacca paśla praź niejki miesiendžar. Naprykład, kab dasłać dadatkovyja foty/videa abo prosta stelefanavacca ź videa.
Minusy buduć?
Tak, kali vy pradajacie aŭto i niejki čas budziecie za miažoj, to biez roŭminhu patencyjny pakupnik da vas nie datelefanujecca i miesiendžary jamu nie dapamohuć, bo realnaha numara ŭ abjavie — niama.
Tamu, kali vam važna, kab z vami mahli źviazacca praź miesiedžar, to vykarystańnie virtualnaha numara nie dla vas. Padčas padačy abjavy treba adklučyć hetuju funkcyju.
Taksama častka karystalnikaŭ skardzicca na toje, što hetym samym kłasifajd palehčyŭ žyćcio pierakupam. Maŭlaŭ, raniej možna było prabić numar pradaŭca praz pošukavik ci admysłovy telehram-bot i ŭbačyć, kolki i jakich mašyn pradavali z hetaha numara.
Ciapier, kali pradaviec moža chavacca za virtualnym numaram, takija sposaby pravierki bolš nie spracujuć.
Ilustracyjnaje fota: Naša Niva
Aproč taho, da minusaŭ možna adnieści toj fakt, što patencyjny pakupnik taksama stračvaje mahčymaść źviazacca praź miesiendžar z pradaŭcom. Dla hetaha ŭ jaho zastanucca tolki pierapiski ŭnutry sajta, što nie tak užo i zručna.
Tym nie mienš, što da vyznačeńnia pierakupaŭ, to takaja mahčymaść u pakupnika zastajecca. Sam av.by jašče raniej uvioŭ tak zvanyja Premium-akaŭnty, uładalniki jakich siarod inšaha atrymlivajuć mahčymaść pravieryć historyju pradaŭca. To-bok usio adno možna daviedacca, kolki mašyn u prodažy było ŭ hetaha pradaŭca raniej.
Ale premium-akaŭnt — reč nie biaspłatnaja. Miesiačny abaniemient kaštuje 250 rubloŭ.
Ci možna schavacca na inšych placoŭkach?
Što da inšych papularnych placovak, to Kufar, ABW i Onliner (prynamsi pakul) prapanujuć tolki całkam schavać numar. U takim razie ŭsia kamunikacyja idzie praz unutranuju pierapisku na sajcie, što nie vielmi zručna.
Ilustracyjny zdymak. Fota: «Naša Niva»
Adnak, kali chtości zachoča vykarystać virtualny numar zamiest realnaha pry padačy abjavy, to mahčymaść zastacca adnosna ananimnym usio adno jość.
Biełarusy mohuć skarystacca pasłuhaj «Virtualny numar» ad «Biełtelekama». Pasłuha płatnaja, i da taho ž hety numar budzie vyhladać jak haradski, a nie jak mabilny, choć zvanki i buduć pieranakiroŭvacca na vaš mabilny.
Mabilnyja apieratary ŭ Biełarusi takich pasłuh fizičnym asobam nie vykonvajuć.