Pajšła ŭ bankructva firma, jakaja źbirałasia vypuskać aŭtamabili Zubr

Kampanija «Zubr Aŭtahrup», jakaja płanavała vypuskać biełaruskija aŭtamabili pad brendam Zubr, akazałasia na miažy bankructva. Ekanamičny sud Minska adkryŭ u dačynieńni da TAA «Zubr Aŭtahrup» konkursnuju vytvorčaść, piša Office Life.

Kali kampaniju pryznajuć bankrutam, heta moža pastavić kropku ŭ historyi prajekta pa stvareńni ŭ Biełarusi aŭtamabilaŭ Zubr.

Prajekt Zubr staŭ viadomy ŭ 2025 hodzie. Tady źjaviłasia infarmacyja, što aŭtamabili pad hetym brendam płanujuć źbirać na zavodzie «Junison», a za asnovu pavinny byli ŭziać madeli kitajskaj marki Forthing. Adnak paźniej Ministerstva pramysłovaści Biełarusi hetuju infarmacyju abvierhła.

Dla realizacyi prajekta stvaryli niekalki kampanij. Adna ź ich — «Zubr Biznesinviest» — taksama niadaŭna pačała praceduru bankructva. Aŭtasałon, dzie mierkavałasia pradavać aŭtamabili, užo byŭ realizavany na aŭkcyjonie, kab choć častkova pahasić daŭhi.

Ciapier u sud z zajavaj ab bankructvie źviarnułasia «Zubr Aŭtahrup» — asnoŭnaja kampanija prajekta. Faktyčna jana nie viadzie dziejnaści ŭžo nie mienš za paŭhoda. U lutym kampanija sprabavała likvidavacca, ale sud zabaraniŭ vyklučać jaje ź dziaržaŭnaha rejestra.

Hałoŭnaja prablema — vialikaja zapazyčanaść pierad kredytorami, u tym liku pierad dziaržavaj. Pavodle danych, ahučanych u sudzie, kampanija pavinna bolš za 14 miljonaŭ rubloŭ, amal 1,1 miljona dalaraŭ i kala 74,5 tysiač jeŭra. U sumie heta bolš za 6 miljonaŭ dalaraŭ.

Aktyvy kampanii aceńvajucca prykładna ŭ 11,3 miljona rubloŭ. Pry hetym amal usia hetaja suma — 9,6 miljona rubloŭ — składajecca z debitorskaj zapazyčanaści. Vierahodna, havorka idzie, u pryvatnaści, pra 30 aŭtamabilaŭ klijentaŭ, jakija, pavodle raniejšych paviedamleńniaŭ kampanii, «zaviśli» za miažoj.

Akramia taho, pavodle infarmacyi analityčnaha resursu ICO castle.by, u «Zubr Aŭtahrup» dahetul jość try vypuski tokienaŭ, pa jakich dapuščany defołt, ale farmalna jany jašče dziejničajuć. Dva vypuski naminavanyja ŭ dalarach — prykładna na 500 tysiač dalaraŭ, jašče adzin — u jeŭra, prykładna na 100 tysiač jeŭra. Termin ich dziejańnia zakančvajecca ŭ 2028 hodzie. Pakul niezrazumieła, ci ŭklučanyja hetyja abaviazacielstvy ŭ ahučanuju ŭ sudzie ahulnuju sumu doŭhu.

Uličvajučy značny abjom zapazyčanaści i niedachop likvidnych aktyvaŭ, vierahodnaść pryznańnia kampanii bankrutam vyhladaje vysokaj. Razhlad spravy pa sutnaści pryznačany na 16 listapada.

Kamientary da artykuła