U starym horadzie Vilni pjany na «Leksusie» źnios dušeŭnuju haradskuju skulpturu «Vadanos»

Z vulicy Lidskaj raptam źnikła praca Ramualdasa Kvintasa — stary čałaviek niasie vadu z Vuhorskich krynic, a sam hladzić u niabiosy i maryć.

Fota: Saulius Žiūra, Delfi.lt

Akazałasia, što pomnik byŭ surjozna paškodžany ŭ vyniku darožnaj avaryi, piša Delfi.lt.

Incydent adbyŭsia ŭviečary ŭ piatnicu, 24 lipienia. Pa źviestkach palicyi, kala 21:42 kiroŭca aŭtamabila Lexus nie daŭ rady kiravańniu na pavarocie, urezaŭsia ŭ achoŭnyja słupočki i źnios skulpturu. Miedycynski ahlad pakazaŭ, što mužčyna byŭ dobra padpiŭšy — u jaho vyjavili 1,84 pramile ałkaholu.

Momant avaryi trapiŭ na videa, jakoje raspaŭsiudziłasia ŭ sacyjalnych sietkach. Na kadrach bačna, jak aŭtamabil vylataje z prajeznaj častki i na poŭnaj chutkaści ŭrazajecca ŭ skulpturu.

Fota: Alaksandr Varanovič, sacsietki

U meryi Vilni paćvierdzili, što pomnik byŭ mocna paškodžany. Ciapier jaho demantavali i pieravieźli na terytoryju municypalnaha pradpryjemstva Grinda, dzie śpiecyjalisty aceńvajuć stupień paškodžańniaŭ. Paśla ekśpiertyzy budzie pryniata rašeńnie, ci možna adrestaŭravać skulpturu i viarnuć jaje na raniejšaje miesca.

Palicyja pačała kryminalnuju spravu pa fakcie kiravańnia transpartnym srodkam u stanie ałkaholnaha apjanieńnia. Pavodle litoŭskaha zakanadaŭstva, kali ŭ kiroŭcy vyjaŭlena 1,51 pramile ałkaholu abo bolš, jamu mohuć pahražać štraf, aryšt abo pazbaŭleńnie voli na termin da adnaho hoda.

Stvaralnik skulptury «Vadanos» Ramualdas Kvintas natchniaŭsia tvorčaściu jaŭrejskaha piśmieńnika Mojše Kulbaka (1896—1937). Hety ŭradženiec Smarhoni peŭny čas žyŭ u Vilni, ale ŭ kancy 1920‑ch pierajechaŭ u Minsk, pra jaki napisaŭ raman «Zełmenianie».

«Vadanos» simvalizuje jaŭreja-vadanosa, jakoha, jak ličycca, časta bačyli ŭ Starym horadzie Vilniusa. Za heta pracu bralisia samyja biednyja žychary horada — jany čerpali vadu z raki i dastaŭlali jaje ŭ kramy i majsterni Staroha horada, dzie nie było vadapravoda.

Kamientary da artykuła