U Francyi ŭ kvatery žančyny znajšli pareštki piaci niemaŭlat
U francuzskim horadzie Aranž, što ŭ departamiencie Vakluz, palicyja zatrymała 32‑hadovuju žančynu paśla taho, jak u jaje kvatery znajšli pareštki piaci niemaŭlat. Prakuratura raspačała kryminalnuju spravu pa fakcie zabojstva dziaciej va ŭzroście da 15 hadoŭ, piša Euronews.
Zdymak ilustracyjny. Fota: magnific.com
Pavodle infarmacyi śledstva, žudasnuju znachodku zrabiŭ hramadzianski muž žančyny. Paśla taho jak jana niekalki dzion tamu naradziła doma zdarovaje dzicia i była dastaŭlenaja ŭ balnicu, mužčyna viarnuŭsia ŭ kvateru, kab razabracca ŭ situacyi.
Padčas ahladu žylla jon znajšoŭ niekalki skrynak, u jakich znachodzilisia kości čatyroch niemaŭlat i cieła jašče adnaho novanarodžanaha. Pra znachodku jon paviedamiŭ u balnicu, adkul infarmacyja była pieradadzienaja prakuroru.
Rasśledavańnie daručyli śpiecyjalizavanamu padraździaleńniu nacyjanalnaj palicyi. Padčas pieratrusu śledčyja kanfiskavali skrynki z pareštkami. Sudova-miedycynski ekśpiert paćvierdziŭ, što jany naležać piaci dzieciam. Dla vyśviatleńnia pryčyn śmierci pryznačanyja ŭskryćcio i łabaratornyja daśledavańni.
Žančyna pakul znachodzicca ŭ balnicy paśla rodaŭ i jašče nie była dapytanaja. Jaje partnior śćviardžaje, što nie viedaŭ pra mahčymyja ciažarnaści svajoj spadarožnicy, tamu na hety momant jon zastajecca na voli.
Para žyła ŭ staroj častcy Aranža i vychoŭvała jašče dvaich dziaciej — vaśmi i dzieviaci hadoŭ. Sacyjalnyja słužby ŭžo zanialisia acenkaj umoŭ ich žyćcia. Novanarodžany chłopčyk, jaki źjaviŭsia na śviet u niadzielu, časova pieradadzieny pad dziaržaŭnuju apieku da pryniaćcia rašeńnia sudom pa spravach niepaŭnaletnich.
Čytajcie taksama:
U Žłobinie raskryli zabojstva niemaŭlaci, učynienaje bolš za 20 hadoŭ tamu
Vynieśli prysud žančynie, jakaja zabiła adno niemaŭla i nie dała naradzicca druhomu