Biełarusbank abmiežavaŭ na svaich kartkach valutna-abmiennyja apieracyi

Biełarusbank časova abmiežavaŭ valutna-abmiennyja apieracyi pa bankaŭskich kartkach. Pra heta paviedamlajecca na aficyjnym sajcie ŭstanovy.

Zdymak ilustracyjny. Fota: Lookby.media

Abmiežavańni nabyli moc 29 lipienia 2026 hoda i tyčacca pieravodaŭ z kartki na kartku pa rachunkach u zamiežnaj valucie — dalarach ZŠA, jeŭra, rasijskich rublach i kitajskich juaniach. Jany raspaŭsiudžvajucca na vypadki, kali valuta pieravodu nie supadaje z valutaj rachunku adpraŭnika i (abo) atrymalnika. Vyklučeńnie zroblena tolki dla apieracyj z vykarystańniem biełaruskich rubloŭ.

U suviazi z uviadzieńniem abmiežavańniaŭ časova niedastupnymi stali adpraŭka i zaličeńnie takich pieravodaŭ u valucie, adroznaj ad valuty rachunku, praź infakijoski i bankamaty Biełarusbanka, sistemu internet-bankinhu, aficyjny sajt banka, servis «M-Bankinh», anłajn-bank Belarusbank, a taksama praz servisy dystancyjnaha absłuhoŭvańnia inšych bankaŭ.

U banku adznačyli, što havorka idzie mienavita pra časovaje abmiežavańnie. Pryčyny jaho ŭviadzieńnia i mahčymyja terminy adnaŭleńnia poŭnaha funkcyjanału pakul nie paviedamlajucca.

Biełarusbank — najbujniejšy bank Biełarusi. Jon byŭ stvorany ŭ 1991 hodzie, a ŭ 1995‑m rearhanizavany paśla źlićcia z Aščadbankam Biełarusi. Dziaržavie naležyć 99,95 pracenta statutnaha fondu banka. Jaho sietka ŭklučaje šeść abłasnych upraŭleńniaŭ, 118 centraŭ bankaŭskich pasłuh i kala 1,2 tysiačy punktaŭ prodažu bankaŭskich praduktaŭ.

Kamientary da artykuła