Raskrytyja padrabiaznaści zabojstva va Ušačach novanarodžanaha dziciaci
Va Ušačach maci pry rodach skinuła dzicia ŭ vyhrabnuju jamu prybiralni.
Śledčy kamitet vyśvietliŭ abstaviny zabojstva 24‑hadovaj žycharkaj haradskoha pasiołka Ušačy svajho novanarodžanaha dziciaci. Jano adbyłosia ranicaj 21 sakavika 2026 hoda.
Žančyna, znachodziačysia ŭ stanie ałkaholnaha apjanieńnia, naradziła chłopčyka ŭ vuličnaj prybiralni ŭ dvary svajho doma. Paśla hetaha jana razarvała pupavinu, i niemaŭla ŭpała ŭ vyhrabnuju jamu. Maci nie sprabavała vyratavać dzicia i prosta viarnułasia ŭ chatu.
Žančyna naŭmysna nie źviartałasia da miedykaŭ i chavała ciažarnaść, bo nie chacieła pakidać dzicia.
Zapeckanuju kroŭju vopratku zaŭvažyŭ sužyciel žančyny. Jaho maci vyklikała chutkuju dapamohu. Miedyki pieradali infarmacyju ŭ milicyju. Milicyjanty znajšli ŭ vyhrabnoj jamie cieła chłopčyka biez prykmiet žyćcia.
Sudova-miedycynskaja ekśpiertyza paćvierdziła, što chłopčyk naradziŭsia žyvym, danošanym i žyćciazdolnym. Jon pamior u vyhrabnoj jamie.
U kryvi niemaŭlaci znajšli etyłavy śpirt, to-bok maci ŭžyvała ałkahol pierad samymi rodami.
DNK-ekśpiertyza paćvierdziła maciarynstva abvinavačvanaj i vyklučyła baćkoŭstva jaje sužyciela.
Na dopycie žančyna patłumačyła, što ŭžo abmiežavana ŭ baćkoŭskich pravach na svaju pieršuju małaletniuju dačku praz pjanstva i adsutnaść pracy. Druhoje dzicia jana nie chacieła, jano było nie ad sužyciela, i jana, pavodle jaje słoŭ, bajałasia jamu pra heta pryznacca.