U Hrecyi padčas mocnaj navalnicy zafiksavali bolš za 100 tysiač małanak

Paśla trochdzionnaj śpioki, kali tempieratura pavietra padymałasia da 42 hradusaŭ, Hrecyju nakryli mocnyja zalevy, hrad i škvalisty viecier. Niepahadź pryviała da padzieńnia dreŭ, pierabojaŭ z elektryčnaściu i surjoznych prablem z transpartam u mnohich rehijonach, u tym liku ŭ staličnaj vobłaści Atyka, paviedamiŭ telekanał ERT-news.

Fota ilustracyjnaje

Pavodle źviestak hrečaskich mietearołahaŭ, z poŭdnia 24 lipienia da rańniaj ranicy 25 lipienia na sušy i ŭ mory było zarehistravana bolš za 100 tysiač małankavych razradaŭ.

U apieratyŭny centr Atyki za hety čas pastupiła 940 zvarotaŭ ad žycharoŭ. Ludzi prasili dapamohi z-za pavalenych dreŭ, pierakulenych śmietnic, a taksama zatapleńniaŭ u damach.

U pryharadzie Afin Ilijonie, a taksama ŭ haradach Cirnavas i Ełasona vypaŭ bujny hrad. U afinskim rajonie Niea-Psichika viecier pavaliŭ elektryčny słup, jaki paškodziŭ pryparkavanyja aŭtamabili. U porcie Pirej budaŭničyja ryštavańni z adnaho z budynkaŭ abrynulisia na tramvajnyja puci. Ludzi nie paciarpieli, ale byli paškodžanyja mašyny.

U horadzie Makrakomi ŭ Centralnaj Hrecyi mocny viecier sarvaŭ dach z doma. Jaho adniesła prykładna na 100 mietraŭ, paśla čaho jon udaryŭsia ab linii elektrapieradačy i paškodziŭ aŭtamabili.

Na hary Alimp niečakana vypaŭ śnieh. U Sałonikach usiu noč išoŭ mocny doždž, što stvaryŭ prablemy dla žycharoŭ horada. Na paŭvostravie Chałkidyki z-za ŭdaraŭ małanak uźnikli dva lasnyja pažary.

Da ranicy 25 lipienia niepahadź u bolšaści rajonaŭ pačała słabieć. Adnak Hrečaskaja mietearałahičnaja słužba papiaredziła pra zachavańnie pavyšanaj niebiaśpieki ŭ rehijonach Mahnisija, na astravach Sparady, Eŭbieja, Tasas, Lemnas i Samatraki, dzie ŭsio jašče mahčymyja ekstremalnyja źjavy nadvorja.

Kamientary da artykuła