«Možna nabyć i ananasy, i butelečku IPA». Biełarusy ŭ zachapleńni ad asartymientu aŭtałaŭki
Kramy na kołach ad «Karony» siońnia kursirujuć pa niekalkich rajonach Minskaj i Viciebskaj abłaściej, a taksama pa vioskach Hrodzienskaha rajona. Biełarusy žartujuć, što heta «łakšery» aŭtałaŭki.
«Vy kali-niebudź bačyli aŭtałaŭku, u jakuju možna zajści i nabyć ananasy, vendžany biekon, butelečku IPA?» — uraziłasia aŭtałaŭkaj Taćciana ŭ Threads. «Fiha sabie łuchary», — adreahavali žychary inšych viosak, kudy pakul takija aŭtałaŭki nie dabralisia.
Voś tak vyhladaje aŭtakrama «Karony» znutry. Fota: @tatsiana_koptsik
Dniami błohier Maksim Reŭt zrabiŭ padrabiazny ahlad źmieściva aŭtamarkieta, jaki sustreŭ u vioscy Hryboŭnia, što ŭ Salihorskim rajonie. U hety dzień jana stała piatym pa liku punktam na maršrucie pradaŭca.
Možna pabačyć, što ŭ mašynie ŭstalavanyja chaładzilniki i kandycyjanier. Pradajuć roznyja vidy miasa, chlebnyja vyraby, małočnyja pradukty, sadavinu z harodninaj, ałkahol. Palicy zapoŭnienyja taksama snekami, krupami, kansiervami i hazavanymi napojami.
U siezon aktyŭna karystajucca aŭtałaŭkaj i dačniki.
U prystaličny rehijon aŭtałaŭki «Karony» ŭvajšli tolki ź lipienia. Ahułam u vioski jany pryjazdžajuć raz ci dva na tydzień. U zaležnaści ad pamieru nasielenaha punkta, robiać tam pa 3‑4 prypynki. Kožny ciahniecca kala 20 chvilin.
Fota: korona.by
Na siońnia aŭtałaŭki absłuhoŭvajuć u Biełarusi kala 14 tysiač sielskich nasielenych punktaŭ. Asnoŭny hulec na hetym rynku — «Biełkaapsajuz». U budučyni čynoŭniki marać dadać u kramy na kołach funkcyju samaabsłuhoŭvańnia.