Andrej Pačobut paprasiŭ premjera Polščy vydavać biełarusam dakumient zamiežnika minimum na try hady

Były palitviazień, žurnalist i aktyvist Sajuza palakaŭ Biełarusi Andrej Pačobut razam z pravaabarončaj arhanizacyjaj Amnesty International źviarnulisia z adkrytym listom da premjer-ministra Polščy Donalda Tuska. Jany prapanavali palepšyć pravavoje stanovišča biełarusaŭ, jakija žyvuć u Polščy, piša vydańnie Most.

Andrej Pačobut u mai 2026 hoda. Fota: Lookby.media

Adnoj z hałoŭnych prapanoŭ stała pavieličeńnie terminu dziejańnia polskaha prajaznoha dakumienta zamiežnika — časovaha dakumienta, jaki zamianiaje nacyjanalny pašpart, — minimum da troch hadoŭ.

U liście adznačajecca, što mnohija biełarusy, jakija znachodziacca ŭ Polščy, nie mohuć viarnucca ŭ Biełaruś, bo aścierahajucca pieraśledu i represij. Z-za hetaha jany nie mohuć atrymać abo abnavić biełaruskija pašparty na radzimie.

U Polščy dla takich ludziej dziejničaje sproščany miechanizm vydačy prajaznoha dakumienta zamiežnika, adnak ciapier jaho dziejańnie rehularna praciahvajecca tolki na karotkija terminy — zvyčajna na paŭhoda. Pavodle aŭtaraŭ zvarotu, takaja situacyja stvaraje pravavuju niapeŭnaść i ŭskładniaje žyćcio biełarusaŭ, jakija žyvuć u Polščy.

Pačobut i dyrektarka polskaha adździaleńnia Amnesty International Anna Błaščak-Banasiak taksama źviarnuli ŭvahu na prablemu dziaciej biełaruskich palityčnych emihrantaŭ, jakija naradzilisia ŭ Polščy.

Jak adznačajecca ŭ liście, takija dzieci mohuć sutyknucca ź ciažkaściami pry lehalizacyi znachodžańnia, bo ich baćki časta nie mohuć aformić dla ich biełaruskija pašparty biez pajezdki ŭsioj siamjoj u Biełaruś. Heta stvaraje ryzyku adsutnaści dakładna vyznačanaha hramadzianskaha statusu.

Siarod prapanavanych mier:

• pavialičyć termin dziejańnia prajaznoha dakumienta zamiežnika jak minimum da troch hadoŭ;
• stvaryć śpiecyjalnuju praceduru atrymańnia dakumienta, jaki paćviardžaje asobu, dla dziaciej hramadzian Biełarusi, narodžanych u Polščy;
• zamacavać u zakanadaŭstvie status prajaznoha dakumienta zamiežnika jak paŭnavartasnaha dakumienta, jaki śviedčyć asobu.

U zvarocie taksama padkreślivajecca, što Polšča pavinna zachoŭvać tradycyi haścinnaści i nie dazvalać inšaj dziaržavie vykarystoŭvać polskuju terytoryju jak srodak cisku na ludziej, jakija vymušanyja pakinuć svaju krainu.

Kamientary da artykuła