Novy trend siarod padletkaŭ — rasšpilenyja džynsy

Džynsy, jakija vyhladajuć tak, niby ich zabylisia zašpilić, stali novym modnym trendam siarod amierykanskaj moładzi. Takija madeli siońnia pradajuć i mas-markiet, i viadomyja dyzajnierskija brendy. Adny ličać ich śmiełym praciaham mody na estetyku 2000-ch, druhija žartujuć, što ŭładalnik prosta zabyŭsia zašpilić štany.

Fota: hollisterco.sa

U modzie zaŭsiody jość trendy, jakija ździŭlajuć starejšaje pakaleńnie. U 2000‑ia heta byli džynsy z nastolki nizkaj pasadkaj, što z-pad ich vyhladała nižniaja bializna. Potym pryjšła moda na skinny (vielmi vuzkija) i naŭmysna parvanyja džynsy, paśla — na biaźmierna šyrokija štany. Ciapier nadyšła čarha džynsaŭ, jakija vyhladajuć rasšpilenymi.

Jak piša The New York Times, novy fason nazyvajuć foldover jeans — litaralna «džynsy z adhornutym pojasam».

Vierchniaja častka takich džynsaŭ adhornutaja i pryšytaja da asnoŭnaj tkaniny. Pad joj časta bačnaja ŭstaŭka ŭ pałosku, kletku abo drobnyja kvietki, jakaja nahadvaje nižniuju bializnu.

Fota: net-a-porter.com

U vyniku stvarajecca iluzija, što šyrynka rasšpilenaja, a štany voś-voś spaduć. Pry hetym sapraŭdnaj małanki ŭ niekatorych madelach uvohule niama: patrebny efiekt stvarajuć adzin-dva rasšpilenyja huziki i adhornuty pojas.

Fota: liberty-center.com

Da novaha fasonu padšturchnuła moda rasšpilvać zvyčajnyja džynsy i advaročvać ich pojas, kab adkryć žyvot i zrabić pasadku jašče nižejšaj. U 2022 hodzie tak źjaŭlalisia na publicy amierykanskaja śpiavačka Doja Cat i pop-zorka Addison Rae, jakaja nabyła viadomaść dziakujučy tyktoku.

Brytanskaja aktrysa Mili Bobi Braŭn, viadomaja pa sieryjale «Vielmi dziŭnyja spravy» (Stranger Things), u 2022 hodzie apublikavała ŭ svaim instahramie fota ŭ rasšpilenych džynsach.

Pastupova vytvorcy adzieńnia pieratvaryli hety pryjom u asobny fason. Ciapier takija džynsy vypuskajuć jak tannyja sietki adzieńnia, tak i luksavyja brendy.

Novy fason užo staŭ pradmietam žartaŭ u sacyjalnych sietkach. Karystalniki pišuć, što čałaviek u takich džynsach vyhladaje tak, niby zabyŭsia zašpilić štany paśla naviedvańnia prybiralni. Razam z tym popyt na madel zastajecca vysokim, a ŭładalniki kramaŭ adznačajuć, što chadavyja pamiery chutka raskuplajuć.

Fota: zalando.pl

Modnyja ahladalniki adznačajuć, što foldover jeans — jašče adno śviedčańnie viartańnia estetyki pačatku 2000-ch. U apošnija hady ŭ modu znoŭ uvajšli nizkaja pasadka, adkryty žyvot, šyrokija džynsy i bačny pojas nižniaj bializny. Džynsy z «rasšpilenaj» šyrynkaj stali čarhovym krokam u hetym kirunku.

Kamientary da artykuła