«Rasija 1» nazvała «spravaj honaru» zabojstva repiera Kyivstoner
Vajenny karespandent Siarhiej Zienin u efiry telekanała «Rasija 1» faktyčna pradkazaŭ zabojstva repiera Kyivstoner (sapraŭdnaje imia — Albiert Vasiljeŭ), jakoha FSB abvinavačvaje ŭ datyčnaści da arhanizacyi ataki bieśpiłotnikaŭ u Padmaskoŭi.
Kyivstoner
Žurnalist nazvaŭ «źniščeńnie» muzykanta «spravaj honaru» dla rasijskaj raźviedki i zajaviŭ, što jaho moža čakać los rasijskaha lotčyka Maksima Kuźminava, zastrelenaha ŭ Ispanii paśla pieralotu na vajennym viertalocie va Ukrainu, piša «Ahienctva».
U siužecie prahramy «Viesti» pra śpiecapieracyju FSB pa praduchileńni ataki dronaŭ na Padmaskoŭje, jaki pakazali ŭ aŭtorak, reparcior nazvaŭ repiera «śvińnioj u čałaviečym abliččy».
— «Narkadyler z pašpartam Ukrainy i ZŠA. A ciapier jašče i teraryst, źniščeńnie jakoha dla našaj raźviedki budzie spravaj honaru», — skazaŭ Zienin.
Pavodle jaho słoŭ, repier žyvie «niedzie ŭ Słavakii» i maje «łohava ŭ Ispanii».
«Znojduć. Nie ŭpieršyniu. Pamiatajecie, čym skončyŭ svajo isnavańnie zdradnik-lotčyk, jaki zabiŭ ekipaž i ŭhnaŭ va Ukrainu bajavy viertalot. U adnoj ź ispanskich pravincyj cieła, prabitaje kulami, pierajechaŭ aŭtamabil. Tady heta było vypadkovym źbieham abstavin. Čamu b vypadkova padobnaje nie mahło paŭtarycca», — zajaviŭ Zienin.
Kyivstoner — ukrainski repier, videabłohier i akcior, jaki atrymaŭ viadomaść jak udzielnik hurta «Hryby» i doŭhi čas pracavaŭ u Rasii. Niezadoŭha da rasijskaha ŭvarvańnia jon viarnuŭsia va Ukrainu, a paśla pačatku vajny asudziŭ dziejańni Rasii.
U aŭtorak ranicaj FSB zajaviła ab praduchileńni ataki na vajennyja abjekty ŭ Maskoŭskaj vobłaści z vykarystańniem 35 bieśpiłotnikaŭ. Da datyčnaści da ataki śpiecsłužba abvinavačvaje byłoha bajca PVK «Vahnier», dvuch hramadzian Małdovy i Kyivstoner.
Sam repier u adkaz na abvinavačańni FSB apublikavaŭ stories, u jakim skazaŭ: «Što, nach…?». Paśla jon vykłaŭ jašče adno videa, dzie adznačyŭ, što nie viedaje, «čym zasłužyŭ takuju ŭvahu»:
— Ja adpačyvaju, bratan, hulaju ŭ Dota. Jakaja, da chalery, arhanizacyja čaho-niebudź?
Maksim Kuźminaŭ, ź jakim vajenkar «Viestiej» paraŭnaŭ Kyivstoner, u žniŭni 2023 hoda pierahnaŭ va Ukrainu rasijski viertalot Mi-8, za što atrymaŭ 500 tysiač dalaraŭ. Padčas pieralotu dvoje členaŭ ekipaža viertalota byli zabityja.
Paźniej na «Rasii 1» vyjšaŭ siužet, u jakim śćviardžałasia, što rasijskija śpiecsłužby ŭžo atrymali zahad ab «likvidacyi» Kuźminava.
U lutym 2024 hoda jon byŭ zabity ŭ Ispanii, kudy pierajechaŭ žyć z Ukrainy pad inšym proźviščam. Hazieta The Wall Street Journal pisała, što vykanaŭcy atrymali najaŭnyja hrošy ad rasijskich čynoŭnikaŭ, jakija pracavali ŭ Vienie.