Daradca Minabarony Ukrainy: Retranślatary ŭ Biełarusi ŭsio adno vykarystoŭvajucca dla atak na Ukrainu
Daradca Ministerstva abarony Ukrainy Siarhiej Biaskrestnaŭ («Fłeš») vykazaŭ mierkavańnie, što terytoryja Biełarusi moža ŭsio adno vykarystoŭvacca dla raźmiaščeńnia retranślataraŭ, jakija dapamahajuć kiravać udarnymi bieśpiłotnikami padčas atak na Ukrainu.
Jak paviedamlaje Biaskrestnaŭ, adzin z kiravanych reaktyŭnych «Šachiedaŭ» u 7:11 ranicy 15 lipienia atakavaŭ aŭtazapraŭku ŭ horadzie Malinie Žytomirskaj vobłaści.
Pavodle danych ukrainskich radyjołakacyjnych sistem, bieśpiłotnik ruchaŭsia ŭzdoŭž miažy ź Biełaruśsiu, zatym źmianiŭ maršrut i nakiravaŭsia da miesca ŭdaru. Takaja trajektoryja, jak śćviardžajecca, moža śviedčyć pra ručnoje kiravańnie dronam praź videakamieru.
Adznačajecca, što adlehłaść ad miesca ataki da rasijskaj terytoryi składaje kala 260 kiłamietraŭ, što ŭskładniaje kiravańnie bieśpiłotnikam niepasredna pa radyjokanale. Pry hetym inšych dronaŭ, jakija mahli b vykarystoŭvacca jak retranślatary, u toj momant u pavietry nie zafiksavali.
«Fłeš» padkreślivaje, što kančatkovyja vysnovy pavinny zrabić śpiecyjalizavanyja słužby paśla poŭnaha analizu situacyi.
Taksama jon śćviardžaje, što dla Rasii važna mieć mahčymaść nanosić udary pa zachodnich rehijonach Ukrainy z dapamohaj bieśpiłotnikaŭ z dystancyjnym kiravańniem, a dla hetaha mohuć vykarystoŭvacca retranślacyjnyja sistemy. Pry hetym nie vyklučajecca, što takija pryłady mohuć raźmiaščacca bieź viedama biełaruskich uładaŭ, pakolki ich ustanoŭka moža zajmać mała času.