Navukoŭcy vyznačyli rysy tvaru, jakija ludzi čaściej za ŭsio ličać pryvabnymi

Mižnarodnaja hrupa daśledčykaŭ praanalizavała sotni trochmiernych madelaŭ čałaviečych tvaraŭ i vyjaviła, jakija ich asablivaści najčaściej źviazvajuć z pryvabnaściu. Aŭtary padkreślivajuć, što havorka nie pra idealny tvar, a pra sukupnaść rys, jakija bolšaść ludziej aceńvaje padobnym čynam.

Źleva — aŭstralijskaja aktrysa Marho Robi, sprava — brytanskaja madel Devid Hendzi. Pavodle žurnalistaŭ Daily Mail, rysy ich tvaraŭ najbolš blizkija da siarednich madelaŭ žanočaha i mužčynskaha tvaraŭ, jakija ŭdzielniki ekśpierymientu acanili jak najbolš pryvabnyja. Fota: commons.wikimedia.org, staronka ŭ instahram

Nakolki pryhožym zdajecca čałaviečy tvar, zaležyć ad asabistych hustaŭ, kultury i žyćciovaha dośviedu. Adnak daśledavańnie, na jakoje źviartaje ŭvahu Daily Mail, pakazvaje, što ŭ acency pryvabnaści isnujuć i davoli ŭstojlivyja zakanamiernaści.

Navukoŭcy z Nacyjanalnaha i Kapadystryjskaha ŭniviersiteta Afin daśledavali 601 maładoha čałavieka. Kožnamu ŭdzielniku zrabili trochmiernaje skanavańnie tvaru.

Kab atrymać maksimalna dakładnuju karcinu, na kožnaj madeli daśledčyki adznačyli 716 aryjenciraŭ, što dazvoliła paraŭnoŭvać formu tvaru ŭ cełym, a nie tolki asobnyja paramietry, naprykład šyryniu nosa abo daŭžyniu padbarodka.

Paśla šeść niezaležnych ekśpiertaŭ — troje mužčyn i troje žančyn — acanili kožny tvar pa škale ad 0 da 100 bałaŭ.

Analiz pakazaŭ, što žanočyja tvary, jakija atrymlivali najvyšejšyja acenki, zvyčajna byli bolš vuzkimi, sa źnižanaj paŭnatoj u vobłaści ščok, vuziejšym nosam z krychu vystupajučym končykam i bolš poŭnymi vusnami.

Trochmiernyja madeli žanočych tvaraŭ, jakija ŭ daśledavańni atrymali (źleva naprava) najmienšyja, siarednija i najbolšyja acenki pryvabnaści. Dźvie apošnija kałonki pakazvajuć vynik nakładańnia siarednich madelaŭ najmienš i najbolš pryvabnych tvaraŭ, a taksama kartu adroźnieńniaŭ pamiž imi: čyrvonyja i sinija zony adlustroŭvajuć učastki, dzie forma tvaru adroźnivajecca najbolš. Krynica: materyjały artykuła / Progress in Orthodontics.

U cełym bolš vysokaja acenka pryvabnaści była źviazanaja z bolš vuhłavataj formaj tvaru, vyraznymi konturami i mienšaj paŭnatoj miakkich tkanak tvaru. Vyklučeńniem była vierchniaja huba, jakaja, naadvarot, była bolš poŭnaj i krychu bolš vystupała napierad.

Trochmiernyja madeli mužčynskich tvaraŭ, jakija ŭ daśledavańni atrymali (źleva naprava) najmienšyja, siarednija i najbolšyja acenki pryvabnaści. Dźvie apošnija kałonki pakazvajuć vynik nakładańnia siarednich madelaŭ najmienš i najbolš pryvabnych tvaraŭ, a taksama kartu adroźnieńniaŭ pamiž imi: čyrvonyja i sinija zony adlustroŭvajuć učastki, dzie forma tvaru adroźnivajecca najbolš. Krynica: materyjały artykuła / Progress in Orthodontics.

Dla mužčyn zaležnaść akazałasia mienš vyraznaj. Tym nie mienš čaściej vysokija acenki atrymlivali tvary z bolš akreślenaj formaj, vyraznym padbarodkam i vuhłavatym profilem.

Pavodle aŭtaraŭ, pryvabnaść nie vyznačajecca niejkaj adnoj «idealnaj» rysaj — nosam, skivicaj abo padbarodkam. Značeńnie maje toje, jak roznyja elemienty spałučajucca pamiž saboj.

«My časta dumajem, što pryhažość całkam subjektyŭnaja, ale dziesiacihodździ daśledavańniaŭ pakazvajuć: ludzi na dziva časta sychodziacca ŭ mierkavańni adnosna taho, jakija tvary ličać pryvabnymi», — adznačyŭ adzin z aŭtaraŭ pracy Hieorhijas Kanavakis.

Daśledčyki taksama nahadvajuć, što fizičnaja pryvabnaść moža ŭpłyvać na mnohija śfiery žyćcia — ad pieršaha ŭražańnia i znajomstvaŭ da prafiesijnych mahčymaściaŭ i ramantyčnych adnosin.

Na ich dumku, vyniki daśledavańnia mohuć dapamahčy śpiecyjalistam, jakija zajmajucca estetyčnaj karekcyjaj tvaru, lepš zrazumieć, jakija rysy ludzi zvyčajna ličać pryvabnymi.

Kamientary da artykuła