Dzieviać krain Jeŭropy prapanavali pazbavić MAK i mižnarodnyja fiederacyi, jakija adnavili rasijan, finansavańnia ES
Inicyjataram zvarotu vystupiła Estonija.
Fota: MAK
Dzieviać jeŭrapiejskich krain źviarnulisia ŭ Jeŭrapiejskuju kamisiju z prapanovaj vyklučyć Mižnarodny alimpijski kamitet (MAK) i mižnarodnyja spartyŭnyja fiederacyi, jakija dapuścili rasijskich i biełaruskich spartsmienaŭ da turniraŭ pad svajoj ehidaj, z prahram finansavańnia Jeŭrasajuza, piša sports.ru.
Inicyjataram zvarotu vystupiła Estonija. Da jaje dałučylisia Danija, Łatvija, Litva, Niderłandy, Polšča, Rumynija, Finlandyja i Šviecyja.
U liście, nakiravanym jeŭrakamisaru sportu Hlenu Mikalefu, prapanujecca pazbavić dostupu da finansavańnia Jeŭrapiejskaha sajuza Mižnarodny alimpijski kamitet, Mižnarodnuju fiederacyju fiechtavańnia i Mižnarodnuju fiederacyju vodnych vidaŭ sportu.
Akramia taho, hetyja krainy prapanavali pierahledzieć udzieł spartyŭnych arhanizacyj, jakija dapuścili rasijan, u mierapryjemstvach, źviazanych z raźvićciom sportu ŭ Jeŭropie.
7 lipienia Mižnarodny alimpijski kamitet adnaviŭ u pravach Alimpijski kamitet Rasii i skasavaŭ usie raniejšyja rekamiendacyi, pavodle jakich rasijskija spartsmieny mahli ŭdzielničać u mižnarodnych spabornictvach tolki ŭ niejtralnym statusie. Paśla hetaha šerah mižnarodnych fiederacyj užo dapuściŭ rasijskich spartsmienaŭ da turniraŭ pad dziaržaŭnym ściaham i z himnam.