U Hiermanii paru ź Iraka prysudzili da pažyćciovaha źniavoleńnia za ŭtrymańnie dziaciej u rabstvie
Vyšejšy ziamielny sud Miunchiena prysudziŭ da pažyćciovaha źniavoleńnia sužencaŭ ź Iraka, jakija trymali ŭ rabstvie dźviuch jezidskich dziaŭčynak. Adnoj ź ich było piać hadoŭ, druhoj — dvanaccać.
Niamieckaja palicyja. Fota: Michael Probst / AP
Pa viersii śledstva, Tvana Ch. i Azija R.z 2015 pa 2017 hady znachodzilisia na terytoryi, padkantrolnaj «Isłamskaj dziaržavie», i tam zrabili dziaciej svaimi rabyniami. Dziaŭčynak prymušali pracavać u domie, hvałtavali i sprabavali vychoŭvać u duchu ideałohii ID, piša Bild.
Pa danych prakuratury, mužčyna nieadnarazova hvałtavaŭ abiedźviuch dziaŭčynak, a jaho žonka dapamahała jamu: rychtavała pakoj i pierad adnym z epizodaŭ nafarbavała adnu z achviar. Akramia taho, starejšuju dziaŭčynku bili pałkaj, małodšaj žančyna apiakła ruku kipniem, taksama abiedźviuch prymušali padoŭhu stajać na adnoj nazie ŭ jakaści pakarańnia.
Kali ID pačała stračvać terytoryi, muž i žonka źbiehli ź Siryi, ale dziaŭčynak nie adpuścili, a pieradali inšym čalcam hrupoŭki. U Niamieččynie ich zatrymali tolki ŭ krasaviku 2024 hoda.
Fiederalnaja prakuratura abvinavačvała ich u złačynstvach suprać čałaviečnaści i vajennych złačynstvach. Sud u Miunchienie pahadziŭsia z abvinavačvańniem pa klučavych punktach.