Pientahon apublikavaŭ novuju porcyju rassakrečanych materyjałaŭ pra NŁA

Ministerstva abarony ZŠA apublikavała čaćviortuju partyju rassakrečanych materyjałaŭ pra nieapaznanyja anamalnyja źjavy. U adkrytym dostupie źjavilisia 40 novych fajłaŭ, siarod jakich dakumienty, videazapisy, aŭdyjafajły i fotazdymki. Materyjały byli pieradadzienyja Pientahonam, NASA, CRU, FBR i Ministerstvam enierhietyki ZŠA, piša The Moscow Times.

Skrynšot ź videa

Bolšaść materyjałaŭ tyčycca nazirańniaŭ za nieapaznanymi abjektami nad Cichim i Atłantyčnym akijanami, a taksama na Blizkim Uschodzie. Značnaja častka zapisaŭ zroblena z dapamohaj infračyrvonych kamier, ustanoŭlenych na vajskovaj technicy.

Adnym z najbolš cikavych dakumientaŭ staŭ spravazdačny materyjał pra incydent 2015 hoda kala jadziernaha abjekta «Panteks» u štacie Techas. Pavodle dakumienta, dvoje supracoŭnikaŭ słužby biaśpieki nazirali nieapaznany latučy abjekt, jaki pralataŭ nad terytoryjaj. Jany sprabavali nablizicca da jaho, ale nie pačuli hukaŭ ruchavikoŭ i nie zmahli razhledzieć prykmiet, što śviedčyli b pra jaho pachodžańnie. Praź niekalki chvilin abjekt źnik.

U archiŭ taksama ŭvajšli videazapisy, zroblenyja ŭ 2019 i 2020 hadach. Na adnym ź ich zafiksavany nievialiki abjekt, jaki ruchaŭsia ź vialikaj chutkaściu, a na druhim — ciomny pradmiet vyšynioj kala čatyroch mietraŭ, što drejfavaŭ pa vietry i nahadvaŭ pavietrany šar niezvyčajnaj formy.

Samyja novyja materyjały datavanyja 2025 hodam. U adnoj sa spravazdač apisvajecca videa, na jakim datčyki zafiksavali abjekt, padobny da šaścikancovaj zorki, a ŭ inšym — śvietłavy abjekt, jaki chutka ruchaŭsia i za jakim nazirali kala piaci chvilin.

Publikacyja hetych archivaŭ adbyvajecca ŭ ramkach prahramy pa rassakrečvańni materyjałaŭ pra nieapaznanyja anamalnyja źjavy, raspačataj pa daručeńni prezidenta ZŠA Donalda Trampa. U Pientahonie adznačyli, što pierad abnarodavańniem z dakumientaŭ byli vydalenyja tolki źviestki, jakija mahli raskryć asoby śviedkaŭ, miescaznachodžańnie sakretnych abjektaŭ i inšuju kanfidencyjnuju infarmacyju.

Kamientary da artykuła