Ad kačahara da «archimandryta», jaki ładzić orhii i pościć hiej-porna. Chto toj relihijny machlar, jakoha aryštavali na Viciebščynie

Siłaviki paviedamili pra kiraŭnika psieŭdarelihijnaj siekty, jaki źbiraŭ hrošy na mifičny chram, a traciŭ ich na ałkahol i orhii z hvałtam i pahrozaj zaražeńnia VIČ. «Naša Niva» vyśvietliła asobu zatrymanaha: im akazaŭsia viadomy relihijny machlar Juryj (Hieorhij) Krot. Były kačahar z Hłuska ŭžo bolš za dziesiać hadoŭ paśpiachova hastraluje pa Biełarusi ŭ rasie, vydajučy siabie za ijerarchaŭ roznych cerkvaŭ, i rehularna traplaje ŭ kryminalnyja chroniki.

Zatrymańnie Juryja Krata ŭ 2019 hodzie. Fota: UUS Viciebskaha abłvykankama

Pavodle śviežaha pres-reliza MUS, 40‑hadovy žychar Viciebskaj vobłaści arhanizavaŭ sietku psieŭdarelihijnych arhanizacyj (niekatoryja ź jakich navat byli pryznanyja ekstremisckimi). Dla zboru srodkaŭ jon aktyŭna vykarystoŭvaŭ sacyjalnyja sietki: prapanoŭvaŭ płatnyja anłajn– i afłajn-rytuały, źbiraŭ achviaravańni na «ŭładkavańnie chrama».

Usie hrošy, jak śćviardžajuć siłaviki, sychodzili na ałkahol i arhanizacyju hrupavych orhij, u jakich kiraŭnik siekty ŭdzielničaŭ asabista. Pry hetym jon nie papiaredžvaŭ partnioraŭ pra svoj stanoŭčy VIČ-status. Bolš za toje, mužčynu vinavaciać u hvałcie nad znajomym, jakoha jon davioŭ da dumak pra samazabojstva.

Zatrymanaha źmiaścili ŭ IČU. U milicyi adznačyli, što raniej jon užo adbyvaŭ pakarańnie za kradziež relihijnych pradmietaŭ, raspaŭsiud parnahrafii i raspusnyja dziejańni ŭ dačynieńni da niepaŭnaletnich.

Juryj Krot u impravizavanym chramie. Fota: VK-supołka «Błahovieŝienije Bożjej Matieri»

«Archimandryt» i były kačahar

Zatrymanym akazaŭsia Juryj Uładzimiravič Krot (viadomy taksama jak Alaksandr Sakałoŭ i Hieorhij Krot), 1985 hoda naradžeńnia. Jon rodam z Mahiloŭskaj vobłaści. Da 2012 hoda Krot pracavaŭ zvyčajnym kačaharam u Hłusku, ale zatym vyrašyŭ kardynalna źmianić prafiesiju, vybraŭšy dla siabie kudy bolš prybytkovuju nišu — relihijnaje machlarstva.

Juryj Krot i «ijerarch» raskolnickaj carkvy, jaki paśviaciŭ jaho ŭ san. 

Pačatak jaho «duchoŭnaj» karjery byŭ fiejeryčnym. U listapadzie 2012 hoda Krot niejkim čynam zdoleŭ uciercisia ŭ davier da rasstryžanaha za kradziež carkoŭnaj majomaści «patryjarcha» raskolnickaj «Rasijskaj Sapraŭdna-Pravasłaŭnaj Katakombnaj Carkvy». Toj u adzin dzień nie tolki pryniaŭ byłoha kačahara ŭ svaju hrupoŭku, ale i adrazu ž paśviaciŭ jaho ŭ «jepiskapa Minskaha i Połackaha, v.a. Ekzarcha ŭsiaje Biełarusi».

Paśviedčańnie archimandrytu Hieorhiju, ihumienu Skita Dabravieščańnia Praśviatoj Baharodzicy, vydadzienaje ŭ 2017 hodzie «mitrapalitam Usierasijskim» Michaiłam ź niejkaj Pravasłaŭnaj kafaličnaj carkvy. Fota z zatrymańnia 2019 hoda. Fota: UUS Viciebskaha abłvykankama

Paśviedčańnie, vydadzienaje ihumienu Hieorhiju Apostalskaj Aŭtakiefalnaj Pravasłaŭnaj Hruzinskaj Carkvoj. Fota: Naša Niva

Atrymaŭšy papieru, Krot pačaŭ hastralavać pa Babrujskaj jeparchii: pradstaŭlaŭsia klirykam Hruzinskaj, Abchazskaj i Ukrainskaj pravasłaŭnych cerkvaŭ, pravodziŭ pryvatnyja nabaženstvy, chryściŭ dziaciej, aśviačaŭ mašyny i, viadoma, źbiraŭ achviaravańni. Prychadžanie addavali jamu nie tolki hrošy, ale i kaštoŭnaści z kampjutarnaj technikaj.

Jak tłumačyŭ paźniej śviatar Babrujskaj jeparchii ajciec Sierhij, Krot byŭ nadzvyčaj pierakanaŭčym. Niekali jon paśpieŭ pabyć słužkam pry manastyry va Ukrainie, dzie vyvučyŭ paradak rytuałaŭ i carkoŭnuju leksiku. Akramia taho, machlar źbiraŭ plotki pra miascovych śviataroŭ i ŭmieła manipulavaŭ hetaj infarmacyjaj, uvachodziačy ŭ davier da ludziej.

Pakajańnie, recydyŭ i pieršaja kryminałka

Karjera «jepiskapa» ŭ Babrujsku skončyłasia chutka. Kali miascovy chram abakrali, milicyja pravieryła ŭ tym liku i Krata. Da rabavańnia jon dačynieńnia nie mieŭ, ale ŭspłyli jaho padroblenyja dakumienty, jakija jon nabyŭ u Maskvie. Aficyjny zapyt u Hruzinski patryjarchat paćvierdziŭ: takoha śviatara nie isnuje.

U śniežni 2012 hoda Krot napisaŭ pakajannuju raśpisku. Jon pryznaŭsia ŭ padmanie, klaŭsia znajści śvieckuju pracu i bolš nie nadziavać rasu.

Raskolnickaja carkva, jakaja jaho paśviaciła, taksama vyhnała jaho sa svaich šerahaŭ z farmuloŭkaj: «za kradziež, padman viernikaŭ i homaseksualnyja pavodziny».

Ale praha da carkoŭnych hrošaj była macniejšaj. U 2015 hodzie Krot znoŭ źjaviŭsia na Babrujščynie: adziety jak śviatar, jon niekalki hadzin jeździŭ na taksi «pa carkoŭnych spravach», paśla čaho źbieh nie raspłaciŭšysia, pakinuŭšy kiroŭcu na pamiać tolki svajo fota i Jevanhielle z aŭtohrafam. BPC tady vypuściła aficyjnaje papiaredžańnie pra machlara.

«Skit» u Kazłovičach

Juryj Krot u impravizavanym chramie. Fota: VK-supołka «Błahovieŝienije Bożjej Matieri»

U 2019 hodzie Hieorhij Krot uspłyŭ užo ŭ Viciebskaj vobłaści. Jaho apietyty vyraśli: ciapier jon nazyvaŭ siabie «nastajacielem Skita Dabravieščańnia Praśviatoj Baharodzicy» i aktyŭna źbiraŭ hrošy praź internet.

Jašče ŭ studzieni 2018 hoda Krot stvaryŭ dla zboru srodkaŭ na adnaŭleńnie mifičnaha «skita» supołku «Ukantakcie» pad nazvaj «Dabravieščańnie Božaj Maci». Miascovaściu paznačanyja Kazłovičy Haradockaha rajona, što za 30 km na poŭnač ad Viciebska. Supołka isnuje dahetul i naličvaje amal 4 tysiačy padpisčykaŭ — davoli vialikaja aŭdytoryja dla takoha śpiecyfičnaha kantentu.

Mienavita hetuju staronku, papiarednie zabluryŭšy, pakazali siłaviki ŭ śviežym videa zatrymańnia 2026 hoda. Deviz hrupy hučyć davoli iranična z ulikam bijahrafii aŭtara: «Hrachi jak hreckija arechi — škarłupinu raskoleš, a ziernie vykałupać ciažka».

Daviedka ab chryščeńni, znojdzienaja ŭ Juryja Krata pry zatrymańni. Fota: UUS Viciebskaha abłvykankama

Jak pakazała apieratyŭnaja zdymka MUS jašče ŭ 2019 hodzie, «chram», u jakim Krot pravodziŭ płatnyja chryščeńni i adpiavańni, ujaŭlaŭ saboj zvyčajny pakoj u žyłym domie, ščylna abviešany abrazami.

Finał hastrolaŭ 2019 hoda byŭ biassłaŭnym: Krot źjechaŭ sa zdymnaj kvatery ŭ Aršanskim rajonie, prychapiŭšy z saboj adzieńnie, bytavuju techniku haspadaroŭ, a taksama 6 abrazoŭ i 8 carkoŭnych knih.

Skrynšot pierapiski nieviadomaha mužčyny ź Juryjem Kratom, jaki dasłaŭ u adkaz intymnyja zdymki. «Ja dumaŭ, vy pastyr. A vy sadamit!» Fota: UUS Viciebskaha abłvykankama

Pry zatrymańni vyśvietliłasia jašče adna pikantnaja detal: na adnoj sa svaich asabistych staronak u sacsietkach «archimandryt» vykładvaŭ pornaroliki.

Tady suprać jaho raspačali spravy za kradziež i raspaŭsiud parnahrafii, a taksama pačali pravierku nakont raspusnych dziejańniaŭ suprać niepaŭnaletnich.

Zatrymańnie Juryja Krata ŭ lipieni 2026 hoda. Fota: UUS Viciebskaha abłvykankama

Miarkujučy z usiaho, paśla adbyćcia pakarańnia za złačynstvy 2019 hoda były kačahar chutka viarnuŭsia da psieŭdarelihijnaj dziejnaści, pačaŭ znoŭ źbirać achviaravańni i pravodzić orhii.

Kamientary da artykuła