Nadmahilli viernuć na Suchuju. Ułady adreahavali na vyvaz kamianioŭ ź Jaŭrejskich mohiłak u Minsku
U adkaz na krytyku vyvazu 250 histaryčnych macevaŭ z terytoryi byłych Jaŭrejskich mohiłak ułady i pradstaŭniki iŭdziejskaj hramady zajavili, što kamiani pieramiaścili tolki časova, i paśla restaŭracyi jany viernucca nazad u vyhladzie novaha miemaryjała.
Vyvaz histaryčnych nadmahillaŭ z terytoryi Jaŭrejskaha miemaryjalnaha parku. Fota: telehram-kanał administracyi Maskoŭskaha rajona Minska.
Raniej abaroncy pomnikaŭ vykazvali niepakoj, što vyviezienyja na vulicu Daŭmana nadmahilli zastanucca kala miascovaj sinahohi nazaŭždy. Heta pazbaviła b terytoryju na vulicy Suchoj apošnich napaminaŭ pra toje, što tut isnavali jaŭrejskija mohiłki, źniščanyja ŭ saviecki čas.
Adnak dniom 3 lipienia, niahledziačy na śviatočny Dzień Niezaležnaści, situacyju aficyjna prakamientavała administracyja Maskoŭskaha rajona Minska.
Zhodna z zajavaj uład, vyvaz kamianioŭ — heta tolki techničny etap. Macevy pieramiaścili dla taho, kab śpiecyjalisty zmahli pravieści ich poŭnuju katałahizacyju, ačyścić ad šmathadovaha brudu i zafiksavać imiony i daty. Dziesiacihodździami hetyja plity razburalisia pad uździejańniem apadkaŭ i pierapadaŭ tempieratur.
Vyvaz histaryčnych nadmahillaŭ z terytoryi Jaŭrejskaha miemaryjalnaha parku. Fota: telehram-kanał administracyi Maskoŭskaha rajona Minska.
Vyvaz histaryčnych nadmahillaŭ z terytoryi Jaŭrejskaha miemaryjalnaha parku. Fota: telehram-kanał administracyi Maskoŭskaha rajona Minska
Paśla zaviaršeńnia prac kamiani abiacajuć viarnuć na vulicu Suchuju. Na ich asnovie budzie stvorany architekturny ansambl — łapidaryj, jaki ŭviekaviečyć pamiać pra niekropal, zasnavany tut jašče ŭ 1868 hodzie.
Dziejańni vałancioraŭ padtrymaŭ i hałoŭny rabin Iŭdziejskaha relihijnaha abjadnańnia ŭ Biełarusi Mardechaj Rajchinštejn.
«Na mohiłkach plity byli raskidanyja chaatyčna. Niama nijakaj suviazi ź miescam, dzie znachodzicca plita, i samoj plitoj, i niama nijakaj harantyi, što ŭ takim vypadku jany buduć zachavanyja. Stvareńnie miemaryjała — adziny sposab dastojna zachavać śviedčańni historyi», — adznačyŭ rabin.
Kiraŭnik administracyi Maskoŭskaha rajona Siarhiej Rubanaŭ paćvierdziŭ, što kancepcyja budučaha miemaryjała abmiarkoŭvałasia z relihijnaj hramadoj jašče ŭ krasaviku. Čynoŭnik asobna padkreśliŭ, što budučy łapidaryj źjavicca mienavita na vulicy Suchoj i stanie značnym abjektam dla ŭsiaho rajona.