Babior trapiŭ pad ciahnik na vačach školnikaŭ u Hiermanii. Dla jaho ratavańnia zatrymali dzieviać ciahnikoŭ
Potym vyśvietliłasia, što heta babrycha, jaje nazvali Barbaraj. U jaje dobryja šancy na vyzdaraŭleńnie.
Na čyhunačnaj stancyi Ciurkienfield niekalki vučniaŭ 6—8 kłasaŭ stali śviedkami taho, jak ciahnik adsiek babru častku chvasta. Paranienaja žyvioła zastałasia na rejkach, a školniki byli nastolki ŭschvalavanyja, što źbiralisia sami spuścicca tudy, kab vyratavać babra, piša telehram-kanał «Što tam u niemcaŭ» sa spasyłkaj na fiederalnuju palicyju.
Na miesca prybyli pravaachoŭniki i pierakryli čyhunačnyja šlachi, heta vyklikała zatrymki dzieviaci ciahnikoŭ. Palicejskija vynieśli paranienuju žyviołu ź niebiaśpiečnaj zony i pieradali jaje vieterynaru, jaki dastaviŭ hryzuna ŭ centr vyratavańnia žyvioł.
Tam vyśvietliłasia, što heta babrycha, jaje nazvali Barbaraj. U jaje dobryja šancy na vyzdaraŭleńnie.
Dyrektar škoły, jaki prybyŭ na stancyju, arhanizavaŭ psichałahičnuju dapamohu dla vučniaŭ.
Vieterynar prapanavaŭ paźniej arhanizavać dla ich ekskursiju ŭ centr vyratavańnia, kab jany mahli sačyć za vyzdaraŭleńniem Barbary.
Kali jana ačuniaje, jaje vypuściać u Francyi — tam bolš terytoryj, prydatnych dla jaje žyćcia, adznačaje palicyja.