Statkievič: Pałochać ukraincaŭ tankami na prypiackich bałotach toje samaje, što pałochać vožyka hołaj zadnicaj
Palityk u svaim telehram-kanale prakamientavaŭ naviny pra vyklučeńnie retranślataraŭ na biełaruska-ŭkrainskaj miažy. Jon piša: «Vyklučyć — nie značyć prybrać».
«Kijeŭ zajaŭlaje, što ŭžo niekalki dzion rasijskija drony nie navodziacca z dapamohaj retranślataraŭ, raźmieščanych na biełaruskaj terytoryi, ale nieviadoma, ci prybrali ich adtul. Pakul što dakładna zrazumieła, što tyja retranślatary prosta nie pracujuć. Ale pa jakoj pryčynie — nieviadoma. Ci to, ich prybrali, u što ja nie vieru, ci ich časova nie skarystoŭvaje rasijski bok paśla prośbaŭ Minska dy iraničnych kamientaroŭ Maskvy», — piša eks-palitviazień.
«Ale ž, adkazvać na ŭkrainskija ŭdary Maskva budzie, a jaje zapas balistyčnych rakiet papaŭniajecca marudna. Tamu, jak vyklučyli retranślatary, tak i ŭklučać padčas čarhovaha ŭdara dronami pa Ukrainie. Na što Kijeŭ adkaža ŭžo biez usialakich ultymatumaŭ i papiaredžańniaŭ.
Sproby ž napałochać Ukrainu z dapamohaj ujaŭnych ci navat sapraŭdnych tankaŭ nijakaha ŭražańnia na Kijeŭ nie akažuć. Bo zaraz pałochać ukraincaŭ tankami na prypiackich bałotach toje ž samaje, što pałochać vožyka hołaj zadnicaj. Tamu maja parada pra aptymalny varyjant reakcyi ŭ vypadku ŭdara pa «nieisnujučych» retranślatarach zastajecca ŭ sile», — napisaŭ Mikałaj Statkievič.
U minułuju piatnicu Uładzimir Zialenski havaryŭ, što na miažy Ukrainy ź Biełaruśsiu, na terytoryi dźviuch biełaruskich abłaściej, raźmieščanyja retranślatary, jakija dapamahajuć Rasii karektavać ahoń pa ŭkrainskim cyvilnym nasielnictvie.
Tady prezident Ukrainy zajaviŭ, što Alaksandru Łukašenku «tydnia budzie dastatkova», kab vyklučyć takuju techniku, inakš Ukraina heta zrobić sama.
U hetuju sieradu Zialenski skazaŭ, što retranślatary nie pracujuć z paniadziełka.