Źjaviŭsia suśvietny rejtynh vytvorcaŭ piva. Na jakim miescy Biełaruś?

Biełaruś uvajšła ŭ lik 60‑ci najbujniejšych vytvorcaŭ piva ŭ śviecie. Pa vynikach 2024 hoda kraina zaniała 58‑je miesca siarod 174 dziaržaŭ i terytoryj, pradstaŭlenych u štohadovaj spravazdačy BarthHaas Report 2024/25, piša Thinktanks.pro.

Fota: Getty Images

BarthHaas — niamieckaja kampanija, jakaja źjaŭlajecca adnym z najbujniejšych suśvietnych pastaŭščykoŭ chmielu. Štohod jana publikuje spravazdaču ab stanie suśvietnaha rynku piva i pivavarnaj haliny.

Siarod susiednich krain Biełaruś sastupaje Rasii, Polščy i Ukrainie pa abjomie vytvorčaści piva. Rasija zaniała 5‑ie miesca ŭ śviecie z abjomam vytvorčaści 2,4 miljarda hałonaŭ, Polšča — 11‑ie miesca z 0,91 miljarda hałonaŭ, a Ukraina raźmiaściłasia na 30‑m miescy z pakazčykam 0,37 miljarda hałonaŭ.

U toj ža čas Litva zaniała 72‑ie miesca, vyrabiŭšy 0,073 miljarda hałonaŭ piva, a Łatvija apynułasia na 111‑j pazicyi z abjomam 0,019 miljarda hałonaŭ.

Suśvietnym lidaram pa vytvorčaści piva zastajecca Kitaj, dzie ŭ 2024 hodzie było zvarana 9,01 miljarda hałonaŭ — heta 18,2% usiaho suśvietnaha vypusku. Druhoje miesca zaniali ZŠA z vynikam 4,87 miljarda hałonaŭ, treciaje — Brazilija z 3,89 miljarda hałonaŭ. U pieršuju piaciorku taksama ŭvajšli Mieksika i Rasija.

Apošnija miescy rejtynhu zaniali nievialikija dziaržavy i terytoryi ź minimalnymi abjomami vytvorčaści. Samy nizki pakazčyk zafiksavany ŭ Hambii i Paŭdniovym Sudanie — pa 50 tysiač hałonaŭ. Taksama ŭ kancy śpisa raźmiaścilisia Paleścina, Paŭnočnaja Kareja i Vanuatu.

Kamientary da artykuła