Aŭtary chita-miljońnika «August» Intelligency rychtujuć svoj debiutny biełaruskamoŭny albom
Hurt Intelligency dapracoŭvaje novy albom. Jon budzie nie tolki pieršym paŭnavartasnym za čatyry hady, ale i pieršym biełaruskamoŭnym u ich dyskahrafii.
Fota: instahram @intelligency_band
«My pišam muzyku ŭžo 12 hadoŭ, sprabavali hrać jaje ŭ mnohich haradach śvietu, ale nikoli nie zadumvalisia pra toje, kab naša tvorčaść pierš za ŭsio była patrebnaja tut [u Biełarusi]. Tamu my vyrašyli zapisać vialiki albom na biełaruskaj movie», — padzialilisia muzyki.
«12 hadoŭ pisać muzyku dziela taho, kab narešcie pryjści da samoha siabie. U nas jość chit «August», u nas jość inšyja pieśni-miljońniki, ale čaho heta ŭsio varta ŭ našy časy? Naš nastupny albom — asablivy, na biełaruskaj movie, dla našych ludziej i prosta dla ŭsich dobrych ludziej. Niachaj budzie śviata muzyki».
Na hety momant viadomyja tolki nazvy trekaŭ budučaj kružełki — «Minsk», «Kamiani», «Tajamnica», «Mara», «Kachańnie». A taksama — niekatoryja ŭryŭki z trekaŭ. Voś, naprykład, niekalki takich kavałkaŭ.
Aŭtary abiacajuć u tekstach šmat paschałak i čysta biełaruskich vyrazaŭ kštałtu «kiń durnoje».
Akramia taho, muzyki ŭžo prezientavali klip na pieśniu «Tajamnica», u jakim jany razam z akciorami miesiać nahami brud, tancujučy na biełaruskim poli, a paśla jaduć chaładnik, hurki, draniki i piečanuju bulbu z małakom. Pry hetym źniata ŭsio ŭ vielmi rejvavym vajbie.
«Niechta skaža: navošta [biełaruskaja] mova, kali heta abmiažuje koła słuchačoŭ? Duraści ŭsio heta — ad hłybokaha nierazumieńnia i ślepaty duchu. Albomy i kancepcyi nikoli nie sastarvajucca; a narodnaje nikoli nie imhniennaje, a viečnaje, i jakoje pašyraje tvaju śviadomaść i duch jak nikoli. A tam, dzie macujecca duch i jość ideja — tam i siła», — upeŭnienyja artysty.
Kankretnaja data relizu biełaruskaha alboma ad Intelligency pakul nieviadomaja.