Nie puścili ŭ Hruziju z-za pajezdki ŭ Abchaziju — biełarus adsudziŭ hrošy ŭ turfirmy
Žychar Homiela praz sud damohsia viartańnia hrošaj za tur u Hruziju paśla taho, jak jamu admovili va ŭjeździe ŭ krainu.
Fota: vecteezy.com
Jak vynikaje z materyjałaŭ spravy, u vieraśni 2025 hoda mužčyna nabyŭ aŭtobusny tur u Hruziju. Adnak na miažy hruzinskija pahraničniki admovili jamu va ŭjeździe. Pryčynaj mahła stać raniejšaja pajezdka ŭ Abchaziju, piša abw.by.
Sud ustanaviŭ, što jašče da zaklučeńnia dahavora turyst udakładniaŭ u pradstaŭnika turfirmy, ci nie ŭźniknuć prablemy pry pierasiačeńni miažy, pakolki raniej jon naviedvaŭ Abchaziju.
U adkaz jamu paviedamili, što kali jon sam nie raspaviadzie pra hetuju pajezdku, to «nichto pra heta nie daviedajecca». Pradstaŭnik turfirmy ŭ sudzie śćviardžała: raniej u tury pa Hruzii jeździli turysty, jakija naviedvali Abchaziju, adnak im nie zabaraniali ŭjezd pahraničnyja słužby Hruzii.
Paśla admovy va ŭjeździe mužčyna zapatrabavaŭ skasavać dahavor i viarnuć hrošy, adnak turfirma admoviłasia zadavolić pretenzii.
Sud pryjšoŭ da vysnovy, što turapieratar nie pradastaviŭ klijentu dakładnuju infarmacyju pra asablivaści ŭjezdu ŭ Hruziju i tym samym parušyŭ patrabavańni zakanadaŭstva ab turyźmie i abaronie pravoŭ spažyŭcoŭ.
U vyniku dahavor akazańnia turystyčnych pasłuh byŭ skasavany. Z turfirmy spahnali:
- košt turu ŭ pamiery 1568,86 rubla;
- transpartnyja vydatki na viartańnie dadomu ŭ sumie 401,67 rubla;
- kampiensacyju maralnaj škody ŭ pamiery 400 rubloŭ.
Akramia taho, sud pryznačyŭ štraf u pamiery 1368,86 rubla za parušeńnie pravoŭ spažyŭca.
Turfirma padała apielacyju, ale Homielski abłasny sud pakinuŭ rašeńnie bieź źmien. Jano ŭstupiła ŭ zakonnuju siłu.