U Varšavie 27 červienia biełarusy ładziać kupalski «Varušniak». Siarod vystupoŭcaŭ — prajekt Ivana Dorna
27 červienia muzyčny fest biełaruskaj kultury «Varušniak. Kupalle» źbiare biełarusaŭ Varšavy na placoŭcy REJS club, kab adznačyć mahičnuju noč Kupalla, piša Reform.news.
Fest u minułym hodzie. Fota: ztinavl.
Hałoŭnaj admietnaściu čaćviortaha «Varušniaku» stanie źmiena farmatu: sioleta arhanizatary zapavolvajuć temp, robiačy staŭku na ŭtulnaść, spakojny embijent, žyvyja akustyčnyja sety i lektoryj. A centralnaj intryhaj 15‑hadzinnaha marafonu abiacaje stać vystup sakretnaha hościa z Paryža.
Chto, kali i dzie?
Impreza, jakaja razhorniecca na dźviuch muzyčnych prastorach — VIANOK i SKALA — pačniecca a 15:00 i praciahniecca až da 6‑j ranicy nastupnaha dnia. Naviedvalnikaŭ čakajuć 15 hadzin muzyki, lekcyj, majstar-kłasaŭ i poŭnaha jadnańnia. Łajn-ap muzyčnaj častcy — bolš za 20 artystaŭ ad folku da ekśpierymientalnaj elektroniki.
Dyk kaho my tut ubačym i pačujem?
SCENA VIANOK — heta Alex Chumak (muzyka i hołas hurta SOYUZ), Applepicker, Emil Zenko, Koloah, Kovvalsky, op1van, Sakrum, Snake Two, Startsev, Yunis, Zal.
SCENA SKALA — słynnaja Šuma, lehiendarny prajekt I/DEX, Ilya Semashkevich, Raketka, Elvira, Feel&Flow, Mufer, Plastik, Pridi, Samogulov.
Adnym z hałoŭnych siurpryzaŭ festu stanie vystup paryžskaha saŭnd-pradusara z prajektam op1van. Arhanizatary trymajuć intryhu, adnak uvažlivyja amatary muzyki i žurnalisty lohka mohuć znajści ŭ sietcy, što pad hetym imiem chavajecca nie chto inšy, jak ukrainski śpiavak i muzyka Ivan Dorn.
Pracesija da vohnišča, lektoryj i kupalski kviz
Akramia maštabnaj muzyčnaj častki, «Varušniak» rychtuje nasyčanuju prahramu, jakaja dapamoža adčuć duch staražytnaha śviata ŭ sučasnym kantekście.
«Varušniak. Kupalle» ŭ minułym hodzie. Fota: ztinavl.
Tak, čakajucca na imprezie:
- Majstar-kłasy pa placieńni viankoŭ, pryhožaje śpieŭnaje šeście žančyn, i, kaniečnie, sapraŭdnaje kupalskaje vohnišča.
- Utulny kirmaš z vyrabami ad biełaruskich majstroŭ, fudkort z vydatnaj ježaj i mastackija zony.
- Intelektualny lektoryj — pahłybleńnie ŭ sakavityja biełaruskija frazieałahizmy z Palinaj PAKRYSIE. Raskaz pra kachańnie Marka Šahała i jahonaj muzy Beły ad Taćciany Makarevič.
- A taksama kupalski indyvidualny kviz ad Paŭła Śviardłova.
Arhanizatary zaprašajuć pražyć hetaje Kupalle jak vialikaje siamiejnaje śviata, jakoje naradžaje moc, jadnaje z karaniami i blizkimi dy dazvalaje napoŭnicca padtrymkaj i luboŭju.
Nabyć kvitki na imprezu možna tut.