Kanał, źviazany z Radaj biaśpieki Biełarusi, pahražaje ŭdarami pa Jeŭropie, kali Ukraina atakuje abjekty ŭ Biełarusi
Biełaruskaja prapahanda adreahavała na ŭltymatum Zialenskaha pahrozami ŭ bok Jeŭropy.
Ilustracyjnaje fota Russian Defense Ministry Press Service via AP
Telehram-kanał «Nievalfovič», jaki źviazvajuć z Radaj biaśpieki Biełarusi, u adkaz na ŭltymatum Uładzimira Zialenskaha pahražaje ŭdarami pa Jeŭropie.
Pa viersii kanała, kali Ukraina atakuje abjekty na terytoryi Biełarusi, heta pieraniasie vajnu ŭ krainy NATA.
«Biełaruś jość častkaj «sajuznaj dziaržavy», a značyć, budzie mieć prava lustrana nanieści ŭdary pa infrastruktury ES, jakaja vykarystoŭvajecca dla zabieśpiačeńnia ŭkrainskaj armii», — piša ananimny aŭtar kanała.
Jon dadaje, što mienavita ŭ Jeŭropie raźmieščany łahistyčnyja vuzły, zavody, składy i centry padrychtoŭki USU.
Kanał taksama spasłaŭsia na śpis celaŭ u Jeŭropie, apublikavany Minabarony Rasii. U im adrasy vytvorčaściej zbroi ad Ryhi i Vilni da Madryda i navat Ankary. Kanał, źviazany ź biełaruskimi ŭładami, namiakaje na ŭdary pa hetych celach «Arešnikam».
Nahadajem, 19 červienia Uładzimir Zialenski vystaviŭ ultymatum Alaksandru Łukašenku. Prezident Ukrainy zapatrabavaŭ demantavać retranślatary dla navihacyi rasijskich dronaŭ u Bresckaj i Homielskaj abłaściach. Na heta Zialenski daŭ Minsku tydzień, paśla čaho, pavodle jaho słoŭ, hetyja retranślatary Ukraina «demantuje» samastojna. Akramia taho, ukrainski prezident zaklikaŭ Łukašenku spynić pastaŭki paliva dla rasijskaj armii.
Sam Łukašenka pakul ultymatumu nie kamientavaŭ.
Čytajcie taksama:
Zialenski nazvaŭ, jakija retranślatary na miažy i biełaruskija pradpryjemstvy chvalujuć Ukrainu