Upieršyniu z 2000 hoda: u Minsku budujuć novuju tramvajnuju kancavuju
Praŭda, heta nie novy maršrut, a skaračeńnie isnujučaha.
U Minsku ŭzvodziać novaje razvarotnaje kalco tramvajaŭ, abo, inakš kažučy, novuju kancavuju, fatahrafijami padzialilisia ŭ Treds, piša Blizko.by.
Kalco robiać kala Pałaca dziaciej i moładzi pa vulicy Staravilenskaj. Praŭda, heta nie novy maršrut, a skaračeńnie ŭžo isnujučaha.
Pavodle prajekta, razvarotnaje tramvajnaje kalco spačatku pieraniasuć ad kancavoj «Voziera» da Pałaca dziaciej i moładzi, kab potym, paśla rekanstrukcyi vulic, znoŭ praciahnuć liniju na poŭnač, za vulicu Arłoŭskuju, ale ŭžo pa Novavilenskaj.
Takim čynam, maršruty №3 (ź Sierabranki), №4 (ad vakzała) i №5 (ź Zialonaha Łuhu) skaračajucca na niekalki prypynkaŭ: z novych maršrutaŭ prybiaruć prypynki «Staravilenski trakt», «Viery Słuckaj» i «Voziera».
Adnak na transpartnych forumach sumniavajucca, što budaŭnictva novaj linii sapraŭdy adbudziecca. Mnohija minčanie miarkujuć, što časovaje kalco kala Pałaca dziaciej i moładzi tak i zastaniecca pastajannym. Zaraz u kamientaryjach taksama hučali skieptyčnyja nastroi:
- «Źniščyli parkoŭku i abrezali liniju na niekalki prypynkaŭ»;
- «Kali treba pabudavać niešta dla taho, kab inšaje źniščyć, to heta robicca chutka».
- Ale byli i tyja, chto ŭzradavaŭsia:
- «Narešcie zmohuć zrabić narmalny vyjezd z horada pa Dałhinaŭskim trakcie biez zatoraŭ»;
- «Nu voś ža, budujuć tramvajnyja šlachi, jak u Jeŭropie!»
Pavodle Blizko.by, novuju kancavuju abstaloŭvajuć upieršyniu z 2000 hoda.
Tady razvarotnaje kalco «Miaśnikova» pieranieśli ad płoščy Miaśnikova praz vulicu Maskoŭskuju bližej da vakzała. Apošniuju novuju tramvajnuju vietku ŭ Minsku prakłali ŭ 1986 hodzie pa vulicy Čapajeva.
Z taho času tramvajnaja sietka i infrastruktura tolki skaračajucca:
- 1990: zakryćcio vietki na Aŭtazavod
- 2013: likvidacyja razvarotnaha kalca «Vałhahradskaja»
- 2015: zakryćcio linii pa vulicy Kastryčnickaj
U 2018 hodzie taksama źbiralisia demantavać razvarotnaje kalco na vulicy Źmitraka Biaduli, ale paśla pietycyi z patrabavańniem zachavać kalco transpartniki aficyjna adkazali, što jano budzie zachavana. Jano acaleła.