Biełarusu ŭ Rasii padkinuli narkotyki, pratrymali ŭ SIZA dva z pałovaj hady — i apraŭdali
U vyniku jon atrymaje kala 6000 jeŭra kampiensacyi.
Ilustracyjnaje fota
Biełarus Siarhiej Danilevič pierabraŭsia ŭ Maskvu jašče ŭ kancy 1990-ch. Pracavaŭ u budaŭničaj śfiery, byŭ namieśnikam hienieralnaha dyrektara ŭ budaŭničaj kampanii.
6 lipienia 2017 hoda Danileviča aryštavali ŭ Niefciakamsku — horad u Baškartastanie. Na jaho zaviali kryminalnuju spravu pa častcy 2 artykuła 228 KK RF — niezakonnyja nabyćcio i zachoŭvańnie narkotykaŭ u bujnym pamiery. Sam Danilevič śćviardžaŭ, što narkotyki jamu padkinuli supracoŭniki palicyi.
U SIZA biełarus pravioŭ 2 hady 4 miesiacy i 11 dzion.
Za hety čas sud dvojčy pryznavaŭ jaho vinavatym — u mai 2018 hoda prysudziŭ 3 hady 2 miesiacy kałonii, u mai 2019‑ha — 3 hady, — ale abodva prysudy Viarchoŭny sud Baškartastana skasoŭvaŭ i viartaŭ spravu na novy razhlad.
Kančatkova Danileviča apraŭdali ŭ vieraśni 2020 hoda — skazali, što nijakaha złačynstva ŭvohule nie było.
Praź niekalki hadoŭ biełarus padaŭ isk da Ministerstva finansaŭ Rasii, patrabujučy kampiensavać maralnuju škodu. Niefciakamski haradski sud pryznačyŭ jamu kala 6000 jeŭra kampiensacyi. Z hetym nie pahadzilisia abodva baki: biełarus prasiŭ bolšuju sumu, Minfin — mienšuju.
U skarzie Danilevič apisvaŭ umovy ŭtrymańnia ŭ izalatary časovaha ŭtrymańnia ŭ Niefciakamsku, kudy jaho etapavali na śledčyja dziejańni: kamiera ŭ padvale, biez vady i prybiralni, bieź vientylacyi i dzionnaha śviatła, z voknami, jakija nie adčyniajucca. Jon kazaŭ, što paśla źniavoleńnia jaho mučajuć pastajannyja hałaŭnyja boli, biessań i pavyšany cisk, a byłaja žonka nie daje jamu bačycca ź dziciem.
Raspad svajoj siamji Danilevič taksama źviazvaŭ z kryminalnym pieraśledam. Sud, adnak, z hetym nie pahadziŭsia: pavodle rašeńnia, šlub faktyčna spyniŭsia jašče ŭ kastryčniku 2016 hoda — da zatrymańnia, — a razvod aformili ŭ 2018-m.
18 vieraśnia 2025 hoda Viarchoŭny sud Baškartastana adchiliŭ abiedźvie skarhi i pakinuŭ sumu bieź źmienaŭ. Biełarus atrymaŭ 6000 jeŭra.