U Polščy buduć sudzić biełarusa, jaki zasnuŭ za rulom aŭtobusa z pasažyrami
U polskim Žešavie buduć sudzić 35‑hadovaha hramadzianina Biełarusi Ramana S., jaki ŭ śniežni 2025 hoda trapiŭ u DTZ na aŭtobusie ź biełaruskimi turystami. Śledstva ŭstanaviła, što aŭtobus ruchaŭsia z chutkaściu kala 94 km/h pry dazvolenych 50 km/h, paviedamlaje Most.
Na miescy avaryi. Fota: KMP Rzeszów
Pavodle słoŭ kiroŭcy, jon zasnuŭ za styrnom i pračnuŭsia tolki pierad kalcavoj raźviazkaj, kali było ŭžo pozna paźbiehnuć avaryi. U aŭtobusie znachodzilisia 48 čałaviek, u tym liku 47 pasažyraŭ. U vyniku DTZ 14 pasažyraŭ byli dastaŭleny ŭ balnicy, 13 ź ich atrymali traŭmy roznaj stupieni ciažkaści. Pahrozy žyćciu paciarpiełych nie było.
Pravierka pakazała, što kiroŭca byŭ ćviarozy. Jon pryznaŭ svaju vinu i paviedamiŭ, što dobra viedaŭ hety maršrut i abmiežavańnie chutkaści, bo šmat razoŭ jeździŭ pa im raniej.
Spačatku mužčynu ŭziali pad vartu, ale ŭ sakaviku 2026 hoda vyzvalili pad zakład sumaj 30 tysiač złotych. Taksama jamu zabaranili pakidać Polšču i zabrali pašpart.
Raniej da kryminalnaj adkaznaści jon nie pryciahvaŭsia. Za nieaściarožnaje ździajśnieńnie DTZ z paciarpiełymi jamu moža pahražać da piaci hadoŭ pazbaŭleńnia voli.