Kudy padziełasia eks-dekan žurfaka BDU Volha Samusievič, jakaja represavała studentaŭ u 2020‑m?
Novym dekanam fakulteta žurnalistyki BDU stała eks-namieśnica dekana pa vučebnaj rabocie i adukacyjnych inavacyjach Lizavieta Chmiel. A što stała ź jaje papiarednikami?
Raniej pasadu dekana zajmaŭ kandydat histaryčnych navuk Alaksiej Bialajeŭ. U mai 2026 hoda infarmacyja pra jaho prosta tajamniča źnikła z sajta žurfaka. Adnak Bialajeŭ dakładna na svabodzie — praciahvaje davać kamientary dziaržaŭnym ŚMI, vystupajučy jašče i jak palitołah. Zachodzić i ŭ prahramu «Kłub redaktaraŭ», chacia nie maje nijakaha dačynieńnia da miedyja.
Alaksiej Bialajeŭ. Fota: sb.by
A čym ciapier zaniataja Volha Samusievič, papiarednica Bialajeva? U 2020‑m i paśla jaho jana prasłaviłasia represijami ŭ dačynieńni da studentaŭ, jakija vychodzili na akcyi pratestaŭ, byli zatrymanyja i adbyvali sutki. Na sutki tady trapili i mnohija vykładčyki fakulteta žurnalistyki. A studentaŭ adličvali z alma-matar.
Volha Samusievič na adnym ź mierapryjemstvaŭ filijała Rasijskaha dziaržaŭnaha sacyjalnaha ŭniviersiteta. Fota: telehram RDSU (Minsk)
Ciapier biełaruskamoŭnaja Volha Samusievič — zahadčyca kafiedry sacyjalnaj pracy ŭ filijale Rasijskaha dziaržaŭnaha sacyjalnaha ŭniviersiteta ŭ Minsku. Jana aktyŭna adznačaje dni Rasii, stvaraje sa studentami kartu narodaŭ Rasii i pa zaprašeńni Rassupracoŭnictva naviedvaje mierapryjemstvy pa zachavańni ruskaj kłasičnaj opiery.
Volha Samusievič naradziłasia ŭ 1977-m. Skončyła fiłałahičny fakultet BDU (1999) i aśpiranturu fakulteta žurnalistyki BDU. Abaraniła kandydackuju dysiertacyju «Biełaruskija ŚMI ŭ łahaśfiery nacyjanalnaj kultury (linhvistyčny aśpiekt») u 2003-m. Z 2002 da 2022 pracavała na fakultecie žurnalistyki, u 2018‑2022 — dekanam.