U «Hazpram centry» patłumačyli, adkul u niedabudavanym chmaračosie ŭziaŭsia hatovy ofis z vazonami
U kancy minułaha tydnia minčanie zaŭvažyli anamaliju na budaŭničaj placoŭcy šmatpakutnaha «Hazpram centra». Na adnym z pavierchaŭ šmatpaviarchovika raptam zakipieła žyćcio. Navat źjaviłasia śviatło ŭ voknach. I heta ŭ budynku biez kamunikacyj.
Za panaramnym škłom źjaviŭsia hatovy interjer — z padviesnymi stolami, pafarbavanymi ścienami, dyvanovym pakryćciom, stałami, kresłami i navat žyvymi raślinami ŭ kadkach. Pry hetym pavierchi vyšej i nižej zastajucca absalutna pustymi bietonnymi skrynkami.
Jak pisali ŭ Threads, za voknami bačyli taksama ludziej u dziełavych harniturach.
Haradžanie tut ža pačali budavać teoryi: ad zdymak kino da paŭtareńnia hruzinskaha dośviedu, kali nižnija pavierchi budynka pačynajuć pracavać jašče da zaviaršeńnia budaŭnictva ŭsiaho abjekta.
Pry hetym błohier Dzianis Blišč, jaki apublikavaŭ zdymki, dadaŭ, što nijakich kamunikacyj u viežy pakul niama.
Pres-słužba kampanii «Hazpram transhaz Biełaruś» patłumačyła Onlíner, što nasamreč adbyvajecca za škłom.
«Padradčyk budaŭnictva pradstaviŭ zakazčyku varyjanty azdableńnia typovaha ofisa. Heta paćviardžaje namier bakoŭ zdać u ekspłuatacyju kompleks u termin — u kancy 2027 hoda», — adkazali tam.
Takim čynam, minaki pabačyli demanstracyjny ofis, jaki ŭźviali na budoŭli, kab zaćvierdzić finalny dyzajn unutranych pamiaškańniaŭ.