U Minsku adkryŭsia novy restaran biełaruskaj kuchni — «Paluški» sa stravami pa receptach lehiendarnaj Aleny Branisłavaŭny
Alena Branisłavaŭna — stvaralnica papularnaj charčeŭni «Paluški» ŭ Turavie sa stravami, jakija jana hatuje vyklučna ŭ piečcy. Svaje kulinarnyja sakrety žančyna pieradała brend-šefu novaha restarana Juryju Saroku, tak što ciapier aŭtentyčnyja stravy prodkaŭ možna budzie pakaštavać u histaryčnym centry Minska — Rakaŭskim pradmieści.
Alena Branisłavaŭna i šef-kuchar staličnych «Palušak» Juryj Saroka. Fota: instahram @palyshki
Asnoŭny kancept minskich «Palušak» palahaje na daśledavańni karanioŭ i ich aktualnym uvasableńni. Navat u interjery stvaralniki imknulisia pieraasensavać viaskovuju chatu. Ścieny tut vykananyja ŭ technicy mazanki. Piečka ŭ centry pamiaškańnia raśpisanaja punsovymi makami, sinimi vałoškami i ramonkami — nibyta zasłanaja rušnikom. Viadoma, nie abyšłosia biez dreva, jakoha tut vielmi šmat, jak i inšych detalaŭ, jakija adsyłajuć da tradycyjnych ramiostvaŭ. Kamanda nazyvaje ŭsio heta «nieafołkam».
Što tyčycca absłuhoŭvańnia haściej, tut chočuć zrabić tak, kab kožny naviedvalnik adčuvaŭ siabie «jak doma», siarod členaŭ siamji.
Interjer «Palušak». Fota: instahram @palyshki
Dla tych, chto nie viedaŭ, paluški — heta maleńkija bułački, «na adzin kuś», z draždžavoha ciesta, jakija tradycyjna vypiakalisia na Paleśsi. Abaviazkovaj ich prysutnaść była na viasiellach i chreśbinach, ale jeli ich i jak samastojnuju stravu ci dadatak da supoŭ kožny dzień.
U novaj kaviarni paluški padajuć da baršču, a taksama ŭ składzie firmovaha chlebnaha košyka.
Chlebny košyk z paluškami ŭ restaranie kaštuje 13 rubloŭ. Fota: instahram @palyshki
Usie stravy pavodle receptu Aleny Branisłavaŭny adznačanyja śpiecyjalnym simvałam-łahatypam u vyhladzie haścinnaj kabiety. Heta, naprykład, bulbianaja kaŭbasa sa škvarkami i tvarožnym syram (32 rubli), paleskija klocki (23 rubli), žur na aŭsianaj zakvascy (28 rubloŭ), vieraščaka na buračnym kvasie z toŭstymi blinami abo dranikami (49 rubloŭ), a taksama tradycyjnaja babka ź piečy (29 rubloŭ).
Łasuny nie zastanucca i biez desiertaŭ: ad Aleny Branisłavaŭny ŭ mieniu — toŭstyja bliny z chatnim hrušavym sočyvam i płambiram. Taksama prapanujecca romavaja baba z parečkavym musam, miadovik i maroziva. Apošniaje padajuć z vareńniem z šyšak.
Frahmient mieniu ź biełaruskimi stravami. Samo mieniu na biełaruskaj movie
Kaviarnia pracuje pa vulicy Viciebskaja, 7 z 12 hadzin dnia da 23 viečara. Ale ŭ piatnicu i subotu čas adkryćcia praciahnuty da 01.00.
Tak vyhladaje padača stravaŭ u «Paluškach». Fota: @taeshtaya
Adznačym, što heta ŭžo nie pieršaje novaje miesca ź biełaruskaj kuchniaj za apošni čas — u Biełarusi ciapier nazirajecca sapraŭdny bum na restarany z tradycyjnymi stravami.