U Charkavie paśla ŭdaru rasijskaha bieśpiłotnika haryć Mastacki muziej. Karciny ratujuć ad ahniu i vady
Udzień 14 červienia rasijski bieśpiłotnik atakavaŭ budynak Charkaŭskaha mastackaha muzieja, vyklikaŭšy mocny pažar. Ratavalniki i supracoŭniki ŭstanovy vymušanyja terminova evakujavać histaryčnyja pałotny ŭ schoviščy, kab źbierahčy ich ad połymia i nastupstvaŭ tušeńnia.
Evakuacyja mastackich tvoraŭ z muzieja. Fota: Suśpilnie Charkiv
Pra ataku na znakavuju ŭstanovu kultury paviedamili ŭkrainskija miedyja sa spasyłkaj na mera horada Ihara Cierachava i kiraŭnika Charkaŭskaj abłasnoj vajennaj administracyi Aleha Siniahubava.
Pavodle papiarednich źviestak, u vyniku pramoha ŭdaru drona abyšłosia bieź fizičnych achviar i paranienych. Adnak niekalki čałaviek byli vymušanyja źviarnucca pa dapamohu da miedykaŭ z-za vostraj reakcyi na stres.
Tušeńnie budynka muzieja. Fota: Charkaŭskaja abłasnaja vajskovaja administracyja
Hałoŭnaj prablemaj paśla prylotu staŭ pažar, jaki chutka achapiŭ histaryčny budynak u centry Charkava. Akramia niepasrednaj pahrozy źniščeńnia ekspanataŭ u ahni, uźnikła surjoznaja ryzyka ich niezvarotnaha paškodžańnia vadoj padčas pracy pažarnych raźlikaŭ.
Kab vyratavać mastackija kaštoŭnaści, haradskija ŭłady arhanizavali maštabnuju evakuacyju. Da apieracyi dałučylisia śpiecyjalisty departamienta nadzvyčajnych situacyj, kamunalnyja słužby i sami pracaŭniki muzieja.
Evakuacyja mastackich tvoraŭ z muzieja. Fota: Suśpilnie Charkiv
Evakuacyja mastackich tvoraŭ z muzieja. Fota: Suśpilnie Charkiv
Evakuacyja mastackich tvoraŭ z muzieja. Fota: Suśpilnie Charkiv
Evakuacyja mastackich tvoraŭ z muzieja. Fota: Suśpilnie Charkiv
Jak raskazaŭ haradski hałava Ihar Cierachaŭ, jaki pracavaŭ na miescy zdareńnia, situacyja patrabavała maksimalna radykalnych i chutkich dziejańniaŭ. Kab dabracca da karcin i apieratyŭna spuścić ich u biaśpiečnaje padziemnaje ŭkryćcio, ratavalnikam davodziłasia vyłomlivać dźviery ŭ vystavačnych pamiaškańniach i fondach.
Pradstaŭniki miascovaj ułady padkreślivajuć, što ŭsie namahańni ciapier kinutyja na toje, kab zachavać kožnaje pałatno, bo jany źjaŭlajucca nieacennaj častkaj kulturnaj pamiaci Charkava.
Paškodžanyja ahniom pałotny. Fota: Suśpilnie Charkiv