Na addalenym vostravie ŭ Indaniezii znoŭ pabačyli vielmi redkaha papuhaja

Na addalenym indaniezijskim vostravie Buru navukoŭcam udałosia znoŭ pabačyć vielmi redkaha papuhaja — burujskaha łarykieta, jakoha amal stahodździe ličyli praktyčna źnikłym, paviedamlaje The Independent.

Burujski łory. Fota: John C. Mittermeier

Da hetaha času pra isnavańnie hetaj ptuški śviedčyli tolki niekalki muziejnych ekspanataŭ, sabranych u 1920‑ch hadach, i adna fatahrafija, zroblenaja ŭ 2014 hodzie. Novaja ekśpiedycyja nie tolki zmahła znoŭ ubačyć hety vid, ale i ŭpieršyniu zapisać jaho hołas.

Burujski łory sustrakajecca tolki na vostravie Buru i bolš nidzie ŭ śviecie. Ptušku znajšli ŭ hornaj miascovaści na najvyšejšaj viaršyni vostrava. Udzielniki ekśpiedycyi nazirali jak minimum dzieviać asobin.

Pošuki byli vielmi składanymi. Daśledčykam daviałosia pieraadolvać stromkija vapniakovyja schiły, skały, burnyja reki i hustyja lasy bieź ściežak. Pavodle ich słoŭ, tolki vialikaja cikavaść da hetaj zahadkavaj ptuški prymusiła ich adpravicca ŭ takoje niebiaśpiečnaje padarožža.

Navukoŭcy miarkujuć, što raniej burujskaha łory nie mahli znajści tamu, što jon žyvie značna vyšej u harach, čym mierkavałasia. Mienavita ciažkadastupnaść hetych terytoryj dapamahła vidu zachavacca niezaŭvažanym.

Zaraz burujski łory ličycca vidam, pra jaki niedastatkova infarmacyi dla dakładnaj acenki jaho stanu. Daśledčyki padkreślivajuć, što adkryćcio — tolki pieršy krok. Napieradzie praca pa vyznačeńni kolkaści ptušak, vyvučeńni ich asiarodździa pražyvańnia i mahčymych pahroz.

Udzielniki ekśpiedycyi adznačyli, što hetaja znachodka stała napaminam pra toje, kolki dziŭnych i małavyvučanych žyvioł jašče zachoŭvaje pryroda. Na ich dumku, takija adkryćci dajuć nadzieju i nahadvajuć pra nieabchodnaść zachavańnia bijałahičnaj raznastajnaści płaniety.

Kamientary da artykuła