Biełarusy zaraz mohuć brać kredyt na Wildberries
Pad jaki pracent?
Fota: Maksim Konstantinov / SOPA Images / LightRocket via Getty Images
Biełarusy ciapier mohuć kuplać tavary na Wildberries u kredyt. Karystalnikam dastupnyja sumy ad 50 da 15 tysiač rubloŭ. Termin vypłat pakupnik moža vybrać u miežach ad 13 da 60 miesiacaŭ (5 hadoŭ), piša Tochka.by.
«Heta dazvolić pakupnikam nabyvać darahija tavary z kamfortnym hrafikam płaciažoŭ i lepš kiravać siamiejnym biudžetam, a pradaŭcam markietplejsa — pavialičvać siaredni ček i kanviersiju zakazaŭ», — prakamientavaŭ kiraŭnik fintechu Wildberries Hieorhij Harškoŭ.
Jakaja pracentnaja staŭka
Kredytuje pakupnikoŭ bank «Dabrabyt». U banku ŭdakładnili, što staŭka fiksavanaja — 24%.
«Dla Biełarusi kredyt — daŭno zvykłaja častka finansavaj kultury. My prosta dadali hetuju zvyčku tudy, dzie ludzi i tak kuplajuć z zadavalnieńniem, — na Wildberries… My paśladoŭna pašyrajem mahčymaści dla našych pakupnikoŭ — kab im było maksimalna zručna na ŭsich etapach, ad pošuku tavaru da vybaru finansavaha rašeńnia pry apłacie», — adznačyŭ dyrektar Wildberries u Biełarusi Dźmitryj Siemiankoŭ.
Kab nabyć tavar u kredyt, na staroncy apłaty pakupniku treba vybrać kredyt ad banka «Dabrabyt».
Paśla hetaha sistema pieranakiruje karystalnika na abaronienuju staronku banka, dzie adbyvajecca praces identyfikacyi.
Dla afarmleńnia kredytu treba aŭtaryzavacca praź Mižbankaŭskuju sistemu identyfikacyi (MSI).
Servis dobra adaptavany pad scenaryi pakupki na markietplejsie: u vypadku, kali tavar nie padydzie, pakupnik moža ad jaho admovicca, jak zvyčajna.
Pry hetym abaviazacielstvy pa kredytnym dahavory buduć pieraličanyja abo zakrytyja, udakładnili ŭ pres-słužbie Wildberries.