Karol Małajzii viarnuŭsia dachaty z pucinskaha parada z rasijskim limuzinam
Karol Małajzii Sułtan Ibrahim Ismaił, jaki sioleta naviedaŭ parad Pieramohi na Krasnaj płoščy ŭ Maskvie, pakinuŭ Rasiju z novym limuzinam rasijskaj marki Aurus Senat, piša The Moscow Times.
Fota: fejsbuk-staronka karala Małajzii
U svaim paviedamleńni ŭ Facebook małajzijski palityk nazvaŭ atrymańnie aŭtamabila «asablivym honaram» i adznačyŭ, što jon simvalizuje siabroŭstva i dobryja adnosiny pamiž Małajzijaj i Rasijaj. Pieradača klučoŭ adbyłasia ŭ maskoŭskim muziei «Haraž asablivaha pryznačeńnia». Pry hetym nie ŭdakładniajecca, byŭ aŭtamabil nabyty ci padaravany.
Aurus Senat — heta pradstaŭnicki aŭtamabil z hibrydnym ruchavikom na bazie V8 i elektramatora, a taksama z mahčymaściu braniravańnia. Jon vykarystoŭvajecca jak aŭtamabil vysokaha ŭzroŭniu dla aficyjnych asob.
Karol Małajzii Sułtan Ibrahim Ismaił sioleta byŭ adnym ź niamnohich kiraŭnikoŭ dziaržaŭ, jakija navažylisia pajechać na parad da Pucina. Akramia jaho byli tolki prezidenty Kazachstana, Łaosa i Uźbiekistana, premjer-ministr Słavakii, kiraŭniki niepryznanych Abchazii i Paŭdniovaj Asiecii, cełaja delehacyja z Respubliki Sierbskaj u składzie Bośnii i Hiercahaviny i Alaksandr Łukašenka.
Čytajcie taksama:
Kola Łukašenka siadzieŭ pobač z baćkam i Pucinym na Krasnaj płoščy
Na śviatkavańnie 9 Maja da Pucina pryjeduć Łukašenka i jašče troje kiraŭnikoŭ dziaržaŭ