U «Biełtechahladzie» raskazali, na što čaściej za ŭsio chvarejuć elektrakary

U «Biełtechahladzie» raskazali pra vyniki techahladu aŭtamabilaŭ u krasaviku 2026 hoda. Pavodle statystyki, kala 12% elektramabilaŭ, jakija prachodzili pravierku, mieli roznyja niaspraŭnaści.

Zdymak ilustracyjny

Za miesiac dazvoł na ŭdzieł u darožnym ruchu atrymali 2771 elektrakar, a ŭ 392 mašyn vyjavili niedachopy. Usiaho było zafiksavana 33 vidy niaspraŭnaściaŭ.

Čaściej za ŭsio prablemy znachodzili ŭ źniešnich śvietłavych pryborach, tarmaznoj sistemie, rulavym kiravańni, kołach i šynach, elemientach chadavoj častki, škle i sistemach jaho abahrevu i abdzimańnia. Taksama vyjaŭlali niedachopy ŭ soncaachoŭnych kazyrkach i inšych elemientach kamplektacyi aŭtamabilaŭ.

Usiaho ŭ krasaviku ŭ Biełarusi vydali bolš za 185 tysiač dazvołaŭ na dopusk transpartnych srodkaŭ da ŭdziełu ŭ darožnym ruchu. Bolšaść ź ich atrymali aŭtaŭładalniki — fizičnyja asoby.

Siarod aŭtamabilaŭ ź bienzinavymi i dyzielnymi ruchavikami kala 13% taksama nie prajšli techahlad ź pieršaha razu z-za roznych parušeńniaŭ i techničnych prablem.

Akramia taho, bolš za piać tysiač čałaviek aformili dazvoł na ŭdzieł u darožnym ruchu ŭ elektronnym vyhladzie praź sistemu «Je-Pasłuha», a dla novych aŭtamabilaŭ 2025—2026 hadoŭ vypusku takuju praceduru možna było prajści biez naviedvańnia dyjahnastyčnaj stancyi.

Kamientary da artykuła