U centry Minska źjavilisia cahlanyja «katedžy». Dla kaho?
Adna z hałoŭnych placovak dla viesiałości ŭ Minsku mianiaje svajo abličča. Da draŭlanych domikaŭ-chatak, što stali ŭžo zvykłymi i pasialilisia kala Pałaca sportu, dadalisia bolš hruntoŭnyja «katedžy». Imitacyja cehły, achoŭnyja naviesy, panaramnyja vokny — tak vyhladajuć novyja, salidnyja, kanstrukcyi. «Aphrejd» nievypadkovy: z pačatku viasny terytoryja ŭ centry horada pieražyvaje novy etap rekanstrukcyi, piša Onliner.by.
Jašče ŭ sakaviku znajomaja ŭsim placoŭka była pierakapana uzdoŭž i ŭpopierak. Rabočyja zajmalisia dobraŭparadkavańniem fantana i terytoryi kala jaho, vysadžvali tui i abiacali paradavać haradžan čymści asablivym.
Siońnia ŭžo jasna, što asablivaje — heta novyja paviljony, jakija adroźnivajucca ad svaich papiarednikaŭ. Dla kaho hetyja domiki? Dla nas z vami. U pamiaškańniach raźmieściacca papularnyja punkty hramadskaha charčavańnia, pad naviesami schavajucca stoliki.
Samo saboj, vydzielać płoščy dla handlu suvienirkaj — znajści jaje možna budzie ŭ paviljonie «Rodny mierč».
«Taksama tut budzie raźmieščany filijał infarmacyjna-turystyčnaha centra, dzie kožny hość stalicy zmoža atrymać poŭnuju infarmacyju ab turystyčnym patencyjale i turystyčnych maršrutach u Minsku i za jaho miežami», — raspavioŭ u efiry telekanała «Biełaruś 1» dyrektar KUP «Minskaja spadčyna» Alaksandr Jacko.
Aficyjnaje adkryćcio abnoŭlenaj placoŭki zapłanavana na 30 maja ŭ ramkach letniaha muzyčna-turystyčnaha siezona. U prahramie anansujuć kinapakazy, interaktyŭnyja kvizy i kvesty, a taksama dydžej-siety ad biełaruskich radyjostancyj.
Zrešty, užo siońnia, 9 maja, placoŭka, dzie tradycyjna pravodziacca ŭsie važnyja haradskija mierapryjemstvy, hatova pryniać usich-usich-usich.