Kiraŭnica «Volnaha choru» Halina Kazimiroŭskaja sutyknułasia ź ciažkaj chvarobaj. Za sutki joj amal sabrali vialikuju sumu, nie chapaje zusim krychu
Učora Halina Kazimiroŭskaja raskazała na «Bajsole» pra toje, što maje ankałohiju, i zaraz nie maje mahčymaści apłačvać arendu kvatery, kuplać bazavyja pradukty i apłačvać darahija leki. Nieabchodna sabrać 8500 jeŭra.
«Imia Haliny Kazimiroŭskaj stała dla mnohich biełarusaŭ sinonimam mužnaści. Siońnia Halina, jakaja pieražyła aryšt, dopyty, sutki na Akreścina i vymušanuju emihracyju, sutyknułasia z voraham, jakoha nielha pieramahčy pieśniaj, — z ankałohijaj. U 2020 «Volny chor» pieratvaryŭ muzyku ŭ značny instrumient mirnaha pratestu. Pad sklapieńniami handlovych centraŭ i na prystupkach fiłarmonij sotni hałasoŭ śpiavali ab svabodzie, pakul režym nie pryznaŭ kalektyŭ «ekstremisckim farmavańniem». Halina ź siamjoj vymušana była źjechać u emihracyju, jak i šmat chto, z udzielnikaŭ choru, ad palityčnaha pieraśledu. (…)
Niahledziačy na kałasalnuju zaniataść, hetaja dziejnaść amal nie prynosiła Halinie dachodu. Adzinaj krynicaj srodkaŭ dla žyćcia byli pryvatnyja ŭroki vakału. Ale ŭ pačatku hetaha hoda ŭsio źmianiłasia.
Dyjahnaz «ankałohija» staŭ dla Haliny tym vyprabavańniem, jakoje patrabuje našaj dapamohi i padtrymki. Prajšoŭšy praz šok i admaŭleńnie, jana pryniała vyklik i zmahajecca z chvarobaj z usich sił. Zaraz jana prachodzić kurs chimijaterapii, napieradzie apieracyja i jašče kursy chimija– i radyjeterapii.
Kožny kurs chimijaterapii — heta źniasilvajučaja bitva. Na kožnaje adnaŭleńnie sychodzić niekalki dzion, i tolki ty adužvaješ, jak novaja doza mocnych preparataŭ pazbaŭlaje ciabie sił. U takim stanie Halina nie moža pracavać, i na ciapierašni momant u jaje prosta niama hrošaj na bazavyja patreby siamji — apłatu žylla, charčavańnie, a z dvuma niepaŭnaletnimi dziećmi hetyja vydatki mocna nie skarociš.
Chimijaterapija mocna paŭpłyvała na stan zdaroŭja ŭ cełym. Taksičnaść chimii razburaje piečań i inšyja orhany, paharšaje ahulny stan i niasie z saboju šmat bolu. Na praciahu ŭsiaho lačeńnia patrebny davoli darahija leki, jakija dapamahajuć padtrymlivać arhanizm, źmianšajuć mocny bol.
Halina pryvykła raźličvać tolki na siabie. Ale zaraz jana apynułasia ŭ biezvychodnaj situacyi: chvaroba pazbaviła jaje mahčymaści vykładać, a heta aznačaje — pazbaviła srodkaŭ na isnavańnie.
U jaje niama mahčymaściapłačvać arendu kvatery, kuplać bazavyja pradukty i apłačvać darahija leki dla adnaŭleńnia arhanizma pamiž kursami chimii. Kab praciahvać lačeńnie i pieramahčy rak, Halinie patrebna padtrymka na najbližejšyja 6 miesiacaŭ», — paviedamlaŭ «Bajsoł».
Suma zboru była €8500:
- €6300 — arenda kvatery na 6 miesiacaŭ + kamunałka
- €1700 — pradukty charčavańnia na 6 miesiacaŭ
- €500 — leki
Za sutki, pa stanie na 10:30 ranicy sierady, sabrana ŭžo 9 000 jeŭra.