Student z Konha, jaki aburyŭsia cenami na Coca-Cola, pakinuŭ Biełaruś i paabiacaŭ raskryć praŭdu

Student z Konha Natan Tełafat, jaki atrymaŭ viadomaść u Biełarusi paśla virusnaha TikTok pra rezkaje padaražańnie Coca-Cola, paviedamiŭ, što byŭ vymušany pakinuć krainu. Ciapier, pavodle jaho słoŭ, jon znachodzicca ŭ biaśpiecy i rychtujecca raskazać usiu historyju biez strachu za nastupstvy, piša vydańnie BGmedia.

Natan Tełafat. Skrynšot ź videa

Ad skarhi na Coca-Cola da zvanka ź milicyi

Historyja Natana pačałasia z, na pieršy pohlad, zvyčajnaha rolika pra ceny. Chłopca ździviła, što Coca-Cola, jakaja raniej kaštavała kala dvuch rubloŭ, padaražeła da piaci. Videa chutka nabrała papularnaść, ale nieŭzabavie, jak śćviardžaŭ sam błohier, jamu patelefanavali ź milicyi i zaprasili na razmovu.

Paśla hetaha Natan apublikavaŭ videa z vybačeńniami, padkreśliŭšy, što nie chacieŭ zakranać palityku, a tolki emacyjna adreahavaŭ na rost cenaŭ. Paźniej jon pryznaŭsia, što bajaŭsia nastupstvaŭ, i navat zajaviŭ, što siłaviki viedajuć jaho adras, kantakty i koła znosin.

«Usio dobra» — ale nie ŭsie pavieryli

Praź niekalki dzion błohier znoŭ vyjšaŭ na suviaź i paviedamiŭ, što razmova ź siłavikami prajšła spakojna, a pretenzij da jaho videa nibyta nie było. Jon taksama adznačyŭ, što lubić Biełaruś, i paprasiŭ žurnalistaŭ nie vykarystoŭvać jaho historyju ŭ palityčnych metach.

Tym nie mienš, častka aŭdytoryi pastaviłasia da hetych zajaŭ ź niedavieram, miarkujučy, što na studenta mahli akazać cisk.

Kanflikt sa strachoŭkaj i dziasiatki tysiač rubloŭ

Paźniej Natan iznoŭ trapiŭ u centr uvahi — užo praz kanflikt z «Biełdziaržstracham» i ŭłaśnicaj arendavanaha žylla. Pavodle jaho słoŭ, paśla pažaru ŭ kvatery, jaki adbyŭsia niekalki hadoŭ tamu, ź jaho pačali patrabavać bujnuju sumu — kala 110 tysiač rubloŭ.

Chłopiec śćviardžaŭ, što ŭžo kampiensavaŭ škodu, ale sutyknuŭsia z novymi finansavymi pretenzijami, nie razumiejučy, čamu historyja atrymała praciah praz try hady. Asobna jon zajaŭlaŭ i pra prablemy ź viartańniem pašparta z boku pravaachoŭnych orhanaŭ.

Novy rolik paśla źniknieńnia: «Ja ŭžo nie ŭ Biełarusi»

Paśla čarhovaj chvali rezanansu błohier źnik z sacsietak na niekalki miesiacaŭ. I tolki 4 traŭnia apublikavaŭ novaje videa, u jakim paviedamiŭ, što bolš nie znachodzicca ŭ Biełarusi.

«Ciapier, kali ja ŭžo nie na terytoryi Biełarusi, dumaju, mahu ŭsio rastłumačyć, nie bajučysia, što da mianie znoŭ pryjduć pozna ŭviečary, jak heta było minułym razam», — zajaviŭ Natan.

Pakul jon nie raskryŭ usich detalaŭ svajho adjezdu, ale paabiacaŭ zrabić heta ŭ nastupnych rolikach. Što mienavita prymusiła studenta źjechać — strach, jurydyčnyja prablemy abo inšyja pryčyny — pakul zastajecca adkrytym pytańniem.

Kamientary da artykuła