«Pieradvybarčy papulizm». U MZS adreahavali na vykazvańnie śpikiera armianskaha parłamienta pra Biełaruś jak hubierniu Rasii

Pres-sakratar MZS Biełarusi Raman Varankoŭ prakamientavaŭ niadaŭniuju zajavu śpikiera parłamienta Armienii Alena Simaniana sa zhadkaj Biełarusi. Jon nazvaŭ jaje niesiabroŭskaj i źviazaŭ z unutranaj palitykaj Armienii.

Alen Simanian

Pa słovach Ramana Varankova, takija vykazvańni — heta nibyta pieradvybarčy papulizm i sproba adciahnuć uvahu armianskaha hramadstva ad unutranych prablem krainy, u tym liku biednaści, biespracoŭja i ekanamičnych ciažkaściaŭ.

Pres-sakratar MZS zajaviŭ, što Biełaruś źjaŭlajecca suvierennaj dziaržavaj, samastojna vyznačaje svaju źniešniuju palityku dy adnosiny z Rasijaj i nie dazvolić inšym krainam siabie «vučyć». Taksama jon nazvaŭ sproby abvinavacić Minsk va ŭmiašańni va ŭnutranyja spravy niedapuščalnymi z punktu hledžańnia dypłamatyi.

Akramia taho, jon raskrytykavaŭ ciapierašni źniešniepalityčny kurs kiraŭnictva Armienii, śćviardžajučy, što jon pryvioŭ da niestabilnaści i zaležnaści ad inšych krain.

Raniej Alen Simanian, vystupajučy ŭ teleefiry, abvinavaciŭ Rasiju ŭ praviadzieńni «palityčnaj apieracyi» dla źmieny ŭłady ŭ Armienii:

«Kali va Ukrainie sprabujuć prasoŭvać svaje intaresy vajennym šlacham, to ŭ Armienii adbyvajecca sproba zachopu ŭłady. Našu demakratyčnaść jany (u Rasii) zaraz sprabujuć vykarystać suprać nas. Kažuć: u vas internet adkryty, my ŭ hetym internecie na svaje rubli kupim stolki rekłamy, što ŭsio budzie našym.

My nie dazvolim pieratvaryć Armieniju ŭ hubierniu. My nie budziem kiravacca tak, jak kirujecca Biełaruś», — zajaviŭ Simanian.

Kamientary da artykuła