U Niderłandach sort ciulpanaŭ nazvali «Minsk»: vysokija, samavityja

Ściabło raśliny dasiahaje paŭmietra, a sama kvietka — 7 santymietraŭ. A što z afarboŭkaj?

Ciulpany sortu «Minsk». Fota: yaskrava.com.ua

Historyja ciulpana, jaki nosić imia biełaruskaj stalicy, pačałasia ŭ hałandskim horadzie Krejł. Mienavita tam śpiecyjalisty firmy Sylvestris B.V. vyvieli novy hatunak, jaki paźniej uvajšoŭ u elitnuju hrupu «Tryumf».

Aficyjny adlik svajho isnavańnia ŭ mižnarodnych rejestrach kvietka viadzie z 28 vieraśnia 2010 hoda — mienavita tady za hatunkam była aficyjna zamacavana nazva Minsk. Paźniej, u 2017 hodzie, paśla paśpiachovych vyprabavańniaŭ i razmnažeńnia, hatunak atrymaŭ poŭnuju jurydyčnuju abaronu ŭ Niderłandskim rejestry sartoŭ pad numaram 40920, a jaho pravaŭładalnikam stała kampanija J.A. Borst Bloembollen B.V. z horada Obdam.

Adpaviedna aficyjnamu bataničnamu apisańniu, «Minsk» — heta dvuchkolerny ciulpan. Asnoŭny koler pialostkaŭ — nasyčany čyrvony (adcieńni 45B i 46B pa mižnarodnaj škale), jaki bližej da krajoŭ płaŭna pierachodzić u aranžava-čyrvony, a zaviaršajecca vyraznaj soniečna-žoŭtaj ablamoŭkaj. Takaja dvuchkolernaść robić buton zaŭvažnym zdalok.

Mocnaje zialonaje ściabło ciulpana dasiahaje 50 santymietraŭ u vyšyniu, a sama kvietka moža dasiahać 7 santymietraŭ. Harmaničny vyhlad raśliny zaviaršaje vuzkaje jajkapadobnaje liście, kančyki jakoha majuć lohkaje fijaletavaje adcieńnie — takoje ž, jak i ŭ vierchniaj častcy ściabła.

Ciulpan sortu «Minsk». Zdamak z sajta Karaleŭskaj ahulnaj asacyjacyi vytvorcaŭ cybulnych raślin (iergewassen.kavb.nl)

Akramia pryhažości, sort «Minsk» maje i važnaje praktyčnaje značeńnie: jon ličycca vielmi «žyvučym». Vytvorcy padkreślivajuć, što ŭ zrezanym vyhladzie hety ciulpan zachoŭvaje śviežaść i formu našmat daŭžej za inšyja sarty, navat kali bukiet staić u śvietłym pakoi pad soniečnymi pramianiami.

Cybuliny hetaha hatunku možna nabyć i ŭ Biełarusi. Pavodle adnaho z sajtaŭ, pry zamovie ad 300 štuk košt adnoj składaje 1 rubiel 39 kapiejek.

Kamientary da artykuła