Ci patrebnaja biełaruskaja mova tym, chto razmaŭlaje pa-rusku? Azaronak zadaŭsia takim pytańniem na STB, a vypusknik Akademii MUS prapanavaŭ zamianić uroki fakultatyvami
Zała padtrymała tych, chto adstojvaŭ nieabchodnaść biełaruskaj movy.
Tok-šou pra biełaruskuju movu. Skrynšot videa STB
«Biełaruskaja mova: ci patrebnaja jana tym, chto razmaŭlaje pa-rusku» — pad takoj nazvaj vyjšła tok-šou na STB «Da!No…» Viadučym vypusku byŭ prapahandyst Ryhor Azaronak.
U tok-šou spračalisia dźvie kamandy. Adna davodziła, što biełaruskaja mova — heta simvał nacyi, i treba spryjać, kab jaje było bolej. Druhaja nie vystupała suprać biełaruskaj movy, ale nie razumieła, jakaja z hetaha praktyčnaja karyść, i adstojvała, što biełaruskaja mova nie pavinna być paŭsiul abaviazkovaj ci ŭvodzicca prymusam.
Advakat Rusłan Piatročanka, vypusknik Akademii MUS (jon byŭ u druhoj kamandzie), vykazaŭ takuju prapanovu:
«Ja liču, što biełaruskuju movu treba padtrymlivać, nie staviačy niejkija hadziny na vučobie ŭ škole ci ŭniviersitetach, a, mahčyma, fakultatyvami, biez adznak, inšymi srodkami».
Rusłan Piatročanka. Skrynšot videa STB
Sam Rusłan vučyŭsia ŭ biełaruskamoŭnaj škole. «Ja pastupiŭ u akademiju paśla škoły — heta byŭ kašmar, tamu što terminy ŭ fizicy, matematycy ja viedaŭ na biełaruskaj movie. Tam pryjšłosia ŭsio pieravučvać, heta było składana».
Z zały padčas pieradačy prahučała pytańnie: čamu vykładčyki biełaruskaj movy za miežami adukacyjnaha pracesu najčaściej razmaŭlajuć pa-rusku.
«U nas u škole nastaŭniki biełaruskaj movy razmaŭlajuć na biełaruskaj movie na ŭrokach i pamiž saboj, tamu što astatnija drenna vałodajuć biełaruskaj movaj — nastaŭniki fiziki, matematyki. I my jak dziaržaŭnyja asoby padparadkoŭvajemsia takomu praviłu, što kali z nami razmaŭlajuć na ruskaj movie, to i my pierachodzim na ruskuju movu»,
— adkazała nastaŭnica biełaruskaj movy i dyrektarka škoły №157 Minska Śviatłana Skrockaja (jana była ŭ kamandzie «za»).
Śviatłana Skrockaja. Skrynšot videa STB
Siarod hledačoŭ u zale byŭ Stanisłaŭ Bažyčka, namieśnik načalnika vuzła pa ideałahičnaj rabocie 62‑ha centralnaha vuzła suviazi Ministerstva abarony. Jon adznačyŭ, što
šmat ludziej vykazvajuć žadańnie prymać prysiahu na biełaruskaj movie — ad 30 da 50%.
Stanisłaŭ Bažyčka. Skrynšot videa STB
U kancy tok-šou prysutnym prapanavali prahałasavać, z arhumientacyjaj jakoj kamandy jany zhodnyja. 69% padtrymali kamandu, jakaja adstojvała nieabchodnaść biełaruskaj movy.
Azaronak u zaklučnym słovie skazaŭ:
«Samaje hałoŭnaje, kab naša moładź, našy dzieci viedali rodnuju biełaruskuju movu i rodnuju ruskuju movu».