Ciškom zvolnili dyrektara Nacyjanalnaha histaryčnaha muzieja. Na jaho miesca čakajuć adyjoznaha deputata-kamunista Kliševiča
Alaksandr Chramy zajmaŭ pasadu z 2021 hoda. Jon adkryta kazaŭ, što padychod da historyi siońnia vyznačajecca «rašeńniem prezidenta».
Nacyjanalny histaryčny muziej. Ilustracyjnaje fota
U Nacyjanalnym histaryčnym muziei Biełarusi źmianiłasia kiraŭnictva. Jak stała viadoma «Našaj Nivie», 50‑hadovy Alaksandr Chramy bolš nie dyrektar: jon pakinuŭ pasadu ŭ hetym miesiacy. Zaraz jaho abaviazki vykonvaje namieśnica, novaha kiraŭnika pakul nie pryznačyli.
Publična pra zvalnieńnie Chramoha nie paviedamlałasia. Jaho imia prosta prybrali z sajta muzieja.
Na subotniku 18 krasavika, kali Łukašenka pajechaŭ na budaŭnictva novaha Nacyjanalnaha histaryčnaha muzieja, Chramoha ŭ kadry vidać nie było. Dakład pra muziej rabiŭ niadaŭna pryznačany ministr kultury Marat Markaŭ.
Alaksandr Chramy ŭznačaliŭ Nacyjanalny histaryčny muziej u krasaviku 2021 hoda. Jon piedahoh pa adukacyi. Spačatku pracavaŭ pa śpiecyjalnaści, paśla rabiŭ karjeru ŭ muziejach. Byŭ vučonym sakratarom u Nacyjanalnym historyka-kulturnym muziei-zapaviedniku «Niaśviž» (2011-2013), zahadčykam ekspazicyjna-vystavačnaha adździeła, namieśnikam dyrektara Nacyjanalnaha histaryčnaha muzieja (2013‑2019). U 2019‑2021 uznačalvaŭ Dziaržaŭny litaraturna-miemaryjalny muziej Jakuba Kołasa.
Alaksandr Chramy
Chramy adkryta kazaŭ, što padychod da historyi vyznačajecca «rašeńniem prezidenta», i što biełarusy pavinny hanarycca svajoj historyjaj u zadadzienaj interpretacyi.
Za hetyja hady muziej usio macniej uklučaŭsia ŭ dziaržaŭnuju ideałahičnuju mašynu i sumiesnyja prajekty z Rasijaj.
U kułuarach abmiarkoŭvajuć, što novym dyrektaram moža stać kamunist Siarhiej Kliševič. Hety adyjozny deputat Pałaty pradstaŭnikoŭ nie maje dačynieńnia da muziejnaj spravy. Jon byŭ pieršym sakratarom Minskaha harkama BRSM i ideołaham Minharvykankama.
U 2016 hodzie na adkryćci pomnika Leninu ŭ Minsku dapamahaŭ amapaŭcam zatrymlivać Źmitra Daškieviča.
Kliševič prapanoŭvaŭ zamianiać nastaŭnikaŭ vajskovymi piensijanierami, nazyvaŭ anučaj nacyjanalny ściah, a ŭ 2020‑m pakazvaŭ fak aŭtamabilistam, jakija sihnalili na praśpiekcie Niezaležnaści.
Siarhiej Kliševič pakazvaje fak aŭtamabilistam, jakija sihnalili ŭ znak asudžeńnia na praśpiekcie Niezaležnaści 20 žniŭnia 2020 hoda
Jon abvinavačvaŭ pratestoŭcaŭ u kiravańni zvonku i vystupaŭ za adličeńnie studentaŭ za ŭdzieł u pratestach.
U mai 2026 hoda Kliševič źbirajecca abaranić dysiertacyju pa temie «Kamsamoł Biełarusi va ŭmovach transfarmacyi savieckaha hramadstva (1985‑1991)».