«Dziaŭčyna niedzie praź siem siekund užo pikiravała bieź piłota». Siabar deltapłanierysta, jaki raźbiŭsia ŭ Stročycach, raskazaŭ, što pryviało da trahiedyi

14 krasavika ŭ muziei narodnaj architektury na vačach u ekskursantaŭ-pieršakłaśnikaŭ adbyłasia katastrofa motadeltapłana. U vyniku zahinuŭ nie tolki piłot, ale i 26‑hadovaja pasažyrka. Pakul Śledčy kamitet vyśviatlaje pryčyny, siabar piłota, šoumen Siarhiej Łapkoŭski, raskazaŭ toje, što viedaje ad kaleh. Detali šakujuć.

Abłomki matadeltapłana «Frehat». 14 krasavika, vioska Aziarco Minskaha rajona. Fota: Dziaržaŭny kamitet sudovych ekśpiertyz

Dniom 14 krasavika kala vioski Aziarco adbyłasia redkaja dla Biełarusi trahiedyja — katastrofa motadeltapłana. Deltapłan raźbiŭsia pobač z muziejem u Stročycach: aparat upaŭ niepadalok ad młyna, u kancy ŭźlotnaj pałasy.

Vidavočcy raskazvali, što amal adrazu paśla ŭźlotu motadeltapłan pačaŭ rezka źnižacca i ŭrešcie ŭpaŭ na ziamlu. Pryčym spačatku z deltapłana vyvaliŭsia mužčyna, paśla ab ziamlu ŭdaryłasia i sama mašyna. Ad atrymanych traŭmaŭ mužčyna i dziaŭčyna pamierli na miescy.

Matadeltapłanam kiravaŭ Rusłan Ivanoŭ — 45‑hadovy instruktar, bolš viadomy jak udzielnik muzyčnaha hurta «Ćviet Ałoe». Pryčynaj trahiedyi stała papadańnie deltapłana ŭ vyklučna mocny ŭzychodny patok ciopłaha pavietra. Takuju viersiju ŭ efiry STV vykazaŭ siabar Rusłana, šoŭmen Siarhiej Łapkoŭski.

— Kažuć, što samaje składanaje — heta ŭźlot. Kali pieršyja 100 mietraŭ projdzienyja, to ŭsio cudoŭna, — raskazaŭ Łapkoŭski. —

Jany ŭźlacieli na 50 [mietraŭ] i ŭ hety momant trapili ŭ ciopły patok, jaki ŭtvaraje [svajho rodu] burbałku. Burbałka vyšturchnuła kryło, i sudna pačało nachilać na 90 hradusaŭ. Jak spraktykavany piłot, Rusłan, dla taho, kab vyraŭnavać, adrazu ž uziaŭ na siabie całkam usio i praktyčna vyraŭnavaŭ dva kryły. [Ale] jak tolki jany stali na miesca, ad hetaha patoku adno z kryłaŭ złamałasia i jany pačali pikavać uniz. Na druhim vitku ad cisku vyrvała ramiani ŭ Rusłana, bakavyja, levyja i pravyja byli razarvanyja, i jon vypaŭ. Nu, a dziaŭčyna niedzie praź siem siekund užo pikavała bieź piłota, — raskazaŭ Łapkoŭski.

Jaho słovy abviarhajuć raniejšaje mierkavańnie niekatorych, što piłot nie byŭ pryšpileny.

Motadeltapłan lotaŭ na bazie papularnaha centra «Avija Minsk».

Dakładnuju pryčynu trahiedyi vyśviatlajuć śpiecyjalisty. Śledčy kamitet spačatku paviedamlaŭ, što pavodle papiarednich acenak, piłot nie daŭ rady kiravańniu. Blizkija Ivanova raskazali, što pry ŭźlocie deltapłan «trapiŭ u niapravilny pavietrany patok, załamała kryło, i jany ŭpali».

Trahiedyja adbyłasia na vačach u dziaciej, što akurat naviedvali muziej.

— Učora majo dzicia było na ekskursii ŭ etnahrafičnym muziei ŭ Stročycach. Jak ja zrazumieŭ, tudy pavieźli achvotnych z usioj paraleli, — raskazaŭ «Anłajnieru» baćka adnaho sa školnikaŭ. — Kali my išli ź dziciom dadomu, jon pačaŭ raskazvać, što padčas ekskursii bačyŭ, jak uźlataŭ, a potym padaŭ deltapłan, jak paśla pryjechali chutkija. Spačatku ja padumaŭ, što dzicia prosta pierakazvaje niejki siužet z hulni, ale viečaram, pačytaŭšy naviny, zrazumieŭ, što dzieci bačyli ŭsio ŭ realnaści.

Nastaŭnica, jakaja supravadžała dziaciej padčas ekskursii, udakładniła, što ŭ pajezdcy byli nie tolki pieršakłaśniki, ale i vučni druhich kłasaŭ.

— My stajali kala viaskovaj škoły, kali ŭźlacieŭ motadeltapłan. Dzieci, naturalna, stali sačyć za palotam. Litaralna praź siekund dvaccać jon staŭ rezka źnižacca. Było zrazumieła, što jon padaje. My znachodzilisia dosyć daloka ad taho miesca, tamu tolki čuli huk udaru aparata ab ziamlu. My prabyli na ekskursii jašče chvilin dvaccać i źjechali. Bačyli tolki, jak da taho miesca imčalisia chutkija i ratavalniki. Žachliva, viadoma, uśviedamlać, što ty staŭ śviedkam takoj trahiedyi…

Aerakłub «Avija-Minsk» raźmieščany ŭ ahraharadku Aziarco na terytoryi Biełaruskaha dziaržaŭnaha muzieja narodnaj architektury i pobytu. Jaho ŭźlotna-pasadačnaja pałasa znachodzicca trochi ŭ baku ad ekskursijnych maršrutaŭ.

Kamientary da artykuła