U Vilni nabirajuć dziaciej u nulavy kłas biełaruskaj himnazii — pałovu ŭžo znajšli, ale pilna treba jašče piaciora
Šmat chto z baćkoŭ prosta nie viedaje pra takuju mahčymaść.
Biełaruskaja himnazija ŭ Vilni, 1 vieraśnia 2025 hoda. Fota: Naša Niva
U adzinaj u Litvie biełaruskaj himnazii imia Francyska Skaryny ŭ Vilni ciapier vyrašajecca los nulavoha kłasa na nastupny navučalny hod.
Pakul u śpisie achvotnych tolki piać dziaciej. Kab kłas adkryŭsia, patrebna minimum dziesiaciora va ŭzroście 4‑6 hadoŭ. Kali hrupu nie nabiaruć da kanca krasavika, nulavy kłas mohuć prosta nie adkryć.
Pra heta ŭ baćkoŭskich čatach i sacsietkach pišuć baćki, dzieci jakich ciapier navučajucca ŭ himnazii. Jany sprabujuć dahrukacca da inšych biełaruskich siemjaŭ — bo šmat chto prosta nie viedaje, što takaja mahčymaść uvohule jość.
«Heta zvyčajnaja dziaržaŭnaja himnazija, ale tam cudoŭnaja navučalnaja baza i nastaŭniki. Kalektyŭ vielmi ciopły, dzieciam tam kamfortna, jany chodziać z zadavalnieńniem. Moj syn za paŭhoda vyvučyŭ biełaruskuju movu, biełaruskija pieśni, hulni, tancy!
Taksama my pavinny adstajać svaje pravy na navučańnie na rodnaj movie. Mahčyma, nie ŭsie baćki viedajuć pra hetuju mahčymaść», — kaža Anastasija, mama vučnia biełaruskaj himnazii.
Adzinaja takaja škoła
U Litvie apošnija hady paśladoŭna ŭzmacniajecca kurs na navučańnie pa-litoŭsku: u škołach nacyjanalnych mienšaściaŭ pavialičvajuć kolkaść urokaŭ dziaržaŭnaj movy, a dla dziaciej zamiežnikaŭ užo pryniata rašeńnie, što z 2026 hoda pačatkovaja adukacyja budzie arhanizoŭvacca tolki na litoŭskaj movie. Zhodna z novymi praviłami, zamiežnyja dzieci (z pastajannym abo časovym dazvołam na žycharstva), jakija raniej nie vučylisia ŭ Litvie i pretendujuć na pačatkovuju adukacyju, zmohuć vybirać dziaržaŭnyja škoły tolki ź litoŭskaj movaj navučańnia.
Himnazija imia Skaryny stała vyklučeńniem i zastajecca faktyčna adzinym miescam u Vilni, dzie dzicia moža z nulavoha kłasa vučycca na biełaruskaj movie. Pry hetym litoŭskuju movu dzieci taksama vyvučajuć z samaha pačatku, biez vypadzieńnia ź miascovaj sistemy adukacyi.
U baćkoŭ jość krychu bolš za dva tydni, kab padać zajavu — da 30 krasavika.
A 22 krasavika ŭ himnazii projdzie dzień adkrytych dźviarej, možna pryjści, pahladzieć, paznajomicca z nastaŭnikami i zadać pytańni. Rehistracyja pa spasyłcy.
Vilenskaja himnazija imia Franciška Skaryny, u jakoj zajmajucca kala 400 vučniaŭ, zasnavanaja ŭ 1994 hodzie spačatku jak škoła, a ŭ 2013 hodzie atrymała status himnazii.