Samy karykaturny złodziej Słonima skončyŭ svoj šlach u miasnym šturmie na Danbasie
U vajnie na baku Rasii zahinuŭ čarhovy biełarus — Andrej Daraškievič. U rodnym horadzie Daraškievič staŭ viadomy svaimi karykaturnymi kryminalnymi pryhodami.
Andrej Daraškievič. Fota: Adnakłaśniki
Andrej Daraškievič naradziŭsia ŭ 1981 hodzie ŭ Słonimie i žyŭ tam ža.
Andreja nie nazvać złosnym bandytam, chacia ŭ rodnym horadzie viadomaść da jaho pryjšła ŭ suviazi z karykaturnymi abstavinami złačynstvaŭ, jakija jon učyniaŭ biez karysnaj zacikaŭlenaści. Prosta kožny raz nie šancavała.
Pavodle infarmacyi Belpol, pieršuju kryminałku Daraškievič u siaredzinie 2000‑ch zarabiŭ tak: vypivaŭ u kampanii kala moładzievaha centra, ściahnuŭ u sabutylnika klučy ad mašyny i pajechaŭ katacca, pakul nichto nie zaŭvažyŭ. Mašynu płanavaŭ viarnuć. Ale nie daŭ rady kiravańniu, raźbiŭ aŭto i ŭciok.
Pieršaja niaŭdača nie pachisnuła luboŭ Daraškieviča da chutkaj jazdy na čužych mašynach, a navučyła tolki, što da spravy treba lepš rychtavacca, kab nie stać vidavočnym padazravanym.
I voś mienš čym praz dva hady Daraškievič źbiŭ zamok z haraža sanatorna-lasnoj škoły, kab sieści za rul kazionnaha VAZa.
Sprava adbyvałasia ŭnačy. Daraškievič źbiraŭsia mašynu viarnuć, ale znoŭ nie daŭ rady kiravańniu, znoŭ raźbiŭ aŭto i znoŭ uciok.
Što jašče adbyvałasia ŭ žyćci słonimca? Papracavaŭ na miascovym «Albiercinie», ažaniŭsia, zavioŭ razam z žonkaj akaŭnt na dvaich u «Adnakłaśnikach». A ŭrešcie pajechaŭ u Rasiju.
Andrej Daraškievič. Fota: Adnakłaśniki
Dalejšyja padrabiaznaści losu Daraškieviča nieviadomyja. Viadomy tolki finał historyi — bolš katacca na čužych mašynach jon nie budzie. Letam 2025 hoda jon zahinuŭ u rajonie Časavaha Jara va Ukrainie, byŭ šturmavikom u rasijskaj v/č 01591.
Vajavaŭ pad pazyŭnym «Muzykant», ale niadoŭha.