Tramp anansavaŭ pieršyja za 34 hady pieramovy Izraila i Livana
Spynieńnie ahniu pamiž Izrailem i livanskaj hrupoŭkaj «Chiezbała» moža być abvieščana «ŭ najbližejšy čas».
Fota: Anna Moneymaker / Getty Images
Prezident ZŠA zajaviŭ, što lidary Izraila i Livana praviaduć pieramovy siońnia ŭ čaćvier.
«Sprabujem stvaryć nievialikuju pieradyšku pamiž Izrailem i Livanam. Prajšło ŭžo šmat času z taho momantu, jak lidary dźviuch krain razmaŭlali, kala 34 hadoŭ. Heta adbudziecca zaŭtra [siońnia — NN]. Vydatna!» — napisaŭ Tramp u Truth Social.
Na minułym tydni premjer-ministr Izraila Bińjamin Nietańjachu paviedamiŭ, što daručyŭ uradu jak maha chutčej pačać pramyja pieramovy ź Livanam.
NBC News i CNN paviedamlali, što pierad hetym amierykanski lidar u telefonnaj razmovie paprasiŭ premjera skaracić udary pa Livanie, kab praduchilić zryŭ krochkaha pieramirja ź Iranam.
Iran śćviardžaŭ, što spynieńnie ŭdaraŭ pa Livanie było častkaj damoŭlenaści ab dvuchtydniovym pieramirji. ZŠA i Izrail heta admaŭlali.
Pavodle infarmacyi Financial Times, spynieńnie ahniu pamiž Izrailem i livanskaj hrupoŭkaj «Chiezbała» moža być abvieščana «ŭ najbližejšy čas». Livanskija surazmoŭcy haziety nie vyklučali, što heta adbudziecca ŭžo «na hetym tydni» — chutčej za ŭsio, paśla taho jak izrailskaja armija voźmie pad kantrol horad Bint-Džbiejl — «bujny apłot» hrupoŭki.