U centry Minska pašyrać muziej milicyi. Kab prybudavać trochpaviarchovy šklany korpus, źmieniać zakon
Muzieju stała ciesna ŭ histaryčnych murach darevalucyjnaha budynka — niama dzie ŭšanavać «sučasnaść» siłavoha viedamstva, tamu vyrašyli prybudavać da jaho trochpaviarchovy šklany korpus. Zabaronu budavać u hetym miescy hatovaje apieratyŭna dapamahčy vyrašyć Ministerstva kultury, jakoje musiła b hetuju zabaronu adstojvać.
Dom pa vulicy Haradski Vał, 7, dzie raźmiaščajecca muziej MUS Biełarusi. Fota: Wikimedia Commons
Dom numar 7 pa vulicy Haradski Vał u Minsku — heta darevalucyjny dvuchpaviarchovy cahlany budynak u styli madern, uźviedzieny ŭ 1914 hodzie.
Paśla vajny tut była stałovaja Ministerstva ŭnutranych spraŭ, raźmieščanaha cieraz darohu, a ciapier — muziej hetaha viedamstva.
Ekspazicyja muzieja MUS Biełarusi. Fota: Jandeks Karty
Ekspazicyja muzieja MUS Biełarusi. Fota: Jandeks Karty
Ale ekspanatam i ambicyjam viedamstva ŭ starych pakojach vidavočna nie chapaje miesca. MUS zapłanavała rekanstrukcyju, jakaja praduhledžvaje ŭźviadzieńnie na miescy ciapierašniaha haspadarčaha naviesa, pad jakim staić rarytetnaja aŭtatechnika, novaha trochpaviarchovaha korpusa.
Apietyt siłavikoŭ prapisany ŭ zadańni na prajektavańnie davoli detalova. Na pieršym, samym maleńkim paviersie (80 m2) pavinna źjavicca placoŭka dla ŭračystych mierapryjemstvaŭ. Na druhim paviersie płoščaj 120 m2 raźmieścicca prastornaja «zała sučasnaści», jakaja budzie złučacca niepasredna z histaryčnym budynkam muzieja. Na trecim — abstalujuć słužbovyja kabiniety dla supracoŭnikaŭ. Kab prybudova vyhladała maksimalna sučasna, prajektantam zahadali ščodra vykarystać škło i prazrystyja kanstrukcyi na nižnich jarusach.
Navies dla retraaŭtamabilaŭ pobač z muziejem MUS, na miescy jakoha chočuć uźvieści prybudovu. Fota: Jandeks Karty
Praz toje, što budynak raźmieščany litaralna ŭ dvary paślavajennaj zabudovy, umovy dla pašyreńnia vielmi abmiežavanyja. Fota: Jandeks Karty
Praŭda, na šlachu milicejskich budaŭničych płanaŭ paŭstała zakanadaŭstva. Reč u tym, što terytoryja vakoł pomnika madernu maje aficyjny status zony achovy łandšaftu.
Ministerstva kultury prademanstravała ŭzornuju biurakratyčnuju pakorlivaść. U aficyjnym liście namieśnik ministra kultury Siarhiej Sarakač pryznaŭ, što pavodle Kodeksa ab kultury budaŭnictva ŭ hetaj łandšaftnaj zonie sapraŭdy zabaroniena.
Schiema zon achovy histaryčnaj kulturnaj kaštoŭnaści, jakija zaminajuć siłavikam uźvieści prybudovu da svajho muzieja. Fota: z tendarnaj dakumientacyi
Adnak čynoŭnik adrazu ž dadaŭ, što jaho viedamstva pryncypova nie piarečyć suprać uźviadzieńnia novaha korpusa dla MUS. Vychad Minkult prapanavaŭ vyklučna prosty: kali zakon zabaraniaje budavać u achoŭnaj zonie, značyć, treba prosta pieramalavać hetyja zony. Bolš za toje, kulturnaje viedamstva paabiacała maksimalna apieratyŭna i biez zatrymak uzhadnić novy prajekt, jak tolki papiery pastupiać im na stoł.
Atrymaŭšy zialonaje śviatło i abiacańni chutkaj dapamohi, Departamient finansaŭ i tyłu MUS abviaściŭ tendar na raspracoŭku novaha prajekta zon achovy, jaki musić jurydyčna apraŭdać źjaŭleńnie šklanoj prybudovy ŭščylnuju da histaryčnaha budynka.