Pašynian: Armienija pieraadoleła błakadu z Azierbajdžanam
Premjer-ministr Armienii Nikoł Pašynian zajaviŭ, što jahonaja kraina ŭvachodzić u novy etap ekanamičnaha raźvićcia, jaki staŭ mahčymy dziakujučy ŭstalavańniu miru z Azierbajdžanam.
Nikoł Pašynian. Fota: AP Photo/Pavel Bednyakov
Pa słovach Pašyniana, važnuju rolu ŭ hetym pracesie adyhrajuć infrastrukturnyja prajekty, u pieršuju čarhu TRIPP («Maršrut Trampa dziela mižnarodnaha miru i roskvitu»). Hety prajekt pavinien kančatkova vyvieści krainu sa stanu transpartnaj izalacyi.
Pry hetym Pašynian adznačyŭ, što ŭžo ciapier Armienija faktyčna pieraadoleła błakadu: čyhunačnyja pieravozki mahčymyja jak praz terytoryju Azierbajdžana, tak i praz Hruziju, u tym liku dla ekspartu.
Asobna jon padkreśliŭ značeńnie budučaha adkryćcia čyhunačnaha złučeńnia ŭ miežach damoŭlenaściaŭ z Azierbajdžanam. Pavodle dasiahnutych palityčnych damoŭlenaściaŭ, hety maršrut budzie pastajannym i nie budzie zakryvacca, što stvoryć nadziejny kanał dla impartu i ekspartu.
Premjer Armienii taksama adznačyŭ, što z 2018 hoda ekanomika krainy istotna vyrasła — pavodle jaho acenki, vałavy ŭnutrany pradukt pavialičyŭsia prykładna na 53%. Heta śviedčyć pra pierachod da novaha etapu, kali pavinny pa-novamu raźvivacca adnosiny pamiž biznesam, dziaržavaj i rabotnikami.
Pašynian padkreśliŭ važnaść roli biznesu ŭ hetych źmienach. Jon adznačyŭ, što mnohija kampanii prynosiać u krainu novaje myśleńnie, kulturu i adkryvajuć novyja mahčymaści dla raźvićcia. Pavodle jaho słoŭ, ciapier pierad Armienijaj adkryvajucca biesprecedentnyja pierśpiektyvy, i hałoŭnaja zadača — efiektyŭna ich vykarystać.