Orbana spytali, ci budzie jon vinšavać Pietera Madźjara ŭ vypadku pieramohi apazicyjnaj partyi «Cisa»
Padčas hałasavańnia na parłamienckich vybarach u Vienhryi hałoŭnyja apanienty vystupili z rezanansnymi zajavami.
Pieter Madźjar, lidar apazicyjnaj partyi «Cisa», paśla hałasavańnia na vybarčym učastku ŭ Budapiešcie, 12 krasavika 2026 h. Fota: AP Photo / Denes Erdos
Lidar apazicyjnaj partyi «Cisa» Pieter Madźjar vykazaŭ absalutnuju ŭpeŭnienaść u svajoj pieramozie, zajaviŭšy: «Nichto nie moža surjozna dumać, što «Cisa», a razam ź joj i Vienhryja, nie vyjhraje vybary».
Pry hetym jon padkreśliŭ, što apazicyja pryznaje vyniki tolki ŭ tym vypadku, kali nie budzie zafiksavana maštabnych falsifikacyj, jakija vyrašalna paŭpłyvali b na vynik.
Madźjar taksama sprahnazavaŭ rekordnuju jaŭku i papiaredziŭ patencyjnych parušalnikaŭ: «Ja nikomu nie raju iści ŭ turmu zamiest fidesaŭskich mafijozi».
Premjer-ministr Viktar Orban, adkazvajučy na pytańnie, ci pavinšuje jon Madźjara ŭ vypadku parazy «Fides», adznačyŭ: «Tak, ja zaŭsiody prytrymlivajusia cyvilizacyjnych standartaŭ».
Na pytańnie «Što b vy zrabili inakš u hetaj kampanii?» Orban adkazaŭ, što heta nie maje značeńnia, bo jany ŭžo heta pieražyli.
Na pytańnie, ci škaduje jon pra što-niebudź za apošnija 16 hadoŭ, jon adkazaŭ: «Vialiki dziakuj, ja ŭ paradku».
Kamientujučy źniešniepalityčnyja pytańni na fonie niadaŭnich uciečak u ŚMI pra jaho suviazi z Kramlom, Orban uchiliŭsia i ad pytańnia, ci ličyć jon siabie siabram Pucina, zajaviŭšy, što Vienhryja imkniecca da siabroŭskich adnosin «ź lidarami ŭsich bujnych dziaržaŭ».
Tym časam vienhierskija vybarščyki stali ŭ vializnyja čerhi, kab prahałasavać.